ប្រទេសរុស្ស៊ី កាលពីថ្ងៃពុធ (១៦ តុលា) បានថ្កោលទោស “ផែនការជ័យជម្នះ” ដែលបង្ហាញដោយប្រធានាធិបតីអ៊ុយក្រែន លោក Volodymyr Zelenskiy ដោយនិយាយថាលោកកំពុងតែព្យាយាមរុញឱ្យសម្ព័ន្ធយោធាណាតូ ចូលទៅក្នុងជម្លោះដោយផ្ទាល់ជាមួយទីក្រុងមូស្គូ។

នៅក្នុងសុន្ទរកថារបស់ខ្លួន លោក Zelenskiy បានអំពាវនាវឱ្យសម្ព័ន្ធមិត្តចាត់វិធានការជាបន្ទាន់ ដើម្បីជំរុញទីក្រុងគីវ ក្នុងពេលមិនច្បាស់លាស់ដើម្បីបញ្ចប់ជម្លោះជាមួយរុស្ស៊ីនៅឆ្នាំក្រោយ។

អ្នកនាំពាក្យក្រសួងការបរទេសរុស្ស៊ី លោកស្រី ម៉ារៀ ហ្សាខារ៉ូវ៉ា (Maria Zakharova) បានប្រាប់អ្នកយកព័ត៌មានថា៖ ផែនការដែលលោក Zelenskiy បានបង្ហាញទៅកាន់សភារបស់លោក នឹងនាំឱ្យមានគ្រោះមហន្តរាយសម្រាប់ប្រជាជនអ៊ុយក្រែន។

លោកស្រី Zakharova បន្តថា “អ៊ុយក្រែន កំពុងរុញណាតូ ឱ្យមានជម្លោះដោយផ្ទាល់ជាមួយរុស្ស៊ី” ដោយព្រមានថា “លោក Zelenskiy មិនអាចពឹងផ្អែកលើដៃគូលោកខាងលិចរបស់ខ្លួនបានឡើយ។ ដៃគូនៃរបបគីវ មើលឃើញអ៊ុយក្រែន នៅក្នុងក្ដាមឈូស និងមើលឃើញពលរដ្ឋអ៊ុយក្រែន ស្ថិតនៅក្នុងផ្នូរ”។

រុស្ស៊ី បានចោទលោកខាងលិចជាយូរមកហើយថាបានប្រើប្រាស់អ៊ុយក្រែន ដើម្បីធ្វើសង្រ្គាមប្រូកស៊ី (សង្រ្គាមតំណាង) ប្រឆាំងនឹងក្រុងមូស្គូ។ សហរដ្ឋអាមេរិក និងសម្ព័ន្ធមិត្តណាតូនិយាយថា ពួកគេកំពុងជួយអ៊ុយក្រែន ការពារខ្លួនប្រឆាំងនឹងការដណ្តើមយកទឹកដីតាមបែបអាណានិគមដ៏អយុត្តិធម៌ប៉ុណ្ណោះ៕