បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump និយាយថា ប្រសិនបើលោកមិនឈ្នះការបោះឆ្នោតថ្ងៃទី០៥ ខែវិច្ឆិកាទេ លោកនឹងចោទថាមានការក្លែងបន្លំ និងមិនទទួលយកលទ្ធផលឡើយ ដូចដែលលោកបានធ្វើកាលពី ៤ឆ្នាំមុន នៅពេលដែលលោកចាញ់ទល់នឹងប្រធានាធិបតីបក្សប្រជាធិបតេយ្យ Joe Biden។

ការបដិសេធណាមួយរបស់ Trump ក្នុងការទទួលយកជ័យជំនះរបស់គូប្រជែងគឺលោកស្រី Kamala Harris អាចធ្វើអោយសហរដ្ឋអាមេរិកធ្លាក់ទៅក្នុងអស្ថិរភាពនយោបាយ ក្នុងពេលដែលប្រទេសនេះមានការបែកបាក់ខ្លាំងរួចទៅហើយ។

គួររម្លឹកថា បន្ទាប់ពីលោក Trump ចាញ់ឆ្នោតឆ្នាំ២០២០ លោក និងសម្ព័ន្ធមិត្តបានព្យាយាមបង្វែរលទ្ធផលតាមរយៈបណ្តឹងរាប់សិបករណី ប៉ុន្តែនៅទីបំផុតនៅតែមិនអាចកែប្រែ ឬពន្យារពេលរាប់សន្លឹកឆ្នោតបាន។

ភាពខុសគ្នាដ៏សំខាន់មួយនៅក្នុងការបោះឆ្នោតឆ្នាំនេះគឺថា លោក Trump មិនមានអំណាចប្រធានាធិបតីដូចដែលលោកបានធ្វើក្នុងឆ្នាំ២០២០ឡើយ ហើយច្បាប់រដ្ឋ និងសហព័ន្ធថ្មីក៏ត្រូវបានដាក់ឱ្យដំណើរការដើម្បីធ្វើឱ្យកាន់តែពិបាកក្នុងការប្រើឥទ្ធិពលលើលទ្ធផលឆ្នោត។

ទោះជាយ៉ាងនេះក្ដី លោក Trump និងសម្ព័ន្ធមិត្ត បាននិងកំពុងក្រាលមូលដ្ឋានគ្រឹះជាច្រើនខែដើម្បីតតាំង ប្រសិនបើលោកចាញ់នៅថ្ងៃទី០៥ ខែវិច្ឆិកា។ លោកក៏អាចប្រឆាំងនឹងជ័យជម្នះរបស់លោកស្រី Harris នៅក្នុងតុលាការ ឬបង្កើនការសង្ស័យពីភាពត្រឹមត្រូវនៃជ័យជម្នះរបស់លោកស្រីក្នុងចំណោមអ្នកគាំទ្រ ដែល អាចនាំឱ្យមានផលវិបាកដែលមិនអាចមើលឃើញជាមុនបាន។

ប្រសិនបើស្ថានភាពបង្ហាញថាលោក Trump ហាក់កំពុងបរាជ័យ ការពន្យារពេលរាប់សន្លឹកឆ្នោតក៏នឹងផ្តល់ឱ្យលោកនូវឱកាសមួយដើម្បីអះអាងការក្លែងបន្លំ និងការប៉ុនប៉ងធ្វើឱ្យខូចទំនុកចិត្តលើមន្ត្រីបោះឆ្នោត ខណៈក៏អាចលើកទឹកចិត្តអ្នកគាំទ្ររបស់ខ្លួនឱ្យតវ៉ាផងដែរ៕