អនុរដ្ឋមន្ត្រីសុខាភិបាលរុស្ស៊ី លោកស្រី យ៉េវហ្គេនៀ កូតូវ៉ា ( Yevgenia Kotova) បាននិយាយថា កុមារជាង ១.៣០០នាក់ បានរងរបួស ដោយសារសកម្មភាពរបស់របបទីក្រុងគីវ ចាប់តាំងពីការចាប់ផ្តើមប្រតិបត្តិការយោធាពិសេស នៅក្នុងប្រទេសអ៊ុយក្រែន។

ដោយពិភាក្សាអំពីការស្តារនីតិសម្បទានូវអ្នកចូលរួមនៃប្រតិបត្តិការយោធាពិសេសនោះ លោកស្រី បានប្រាប់ក្រុមការងារនៃសភាជាន់ទាបរបស់រុស្ស៊ីថា៖«សរុបមក កុមារជាង ១.៣០០ នាក់បានរងរបួស ចាប់តាំងពីការចាប់ផ្តើមប្រតិបត្តិការយោធាពិសេស។ ជំនួយផ្នែកវេជ្ជសាស្រ្ត ត្រូវបានផ្តល់ជូនដល់កុមារទាំងអស់ដែលត្រូវការវា រួមទាំងការព្យាបាលកម្រិតខ្ពស់»។ 

កុមារមួយចំនួនក្នុងចំណោមកុមារទាំងនោះ ត្រូវបានគេរកឃើញថា មានរបួសដោយសារការប៉ះទង្គិចផ្លូវចិត្ត របួសដោយគ្រាប់កាំភ្លើង និងរបួសរួមគ្នាយ៉ាងធ្ងន់ធ្ងរ។

នៅពេលនេះ កុមារចំនួន ៨៣នាក់ ដែលរងរបួសដោយសារអាវុធរបស់រដ្ឋាភិបាលទីក្រុងគីវ កំពុងត្រូវបានព្យាបាលនិងថែទាំយ៉ាងយកចិត្តទុកដាក់បំផុត។