រយៈពេលប៉ុន្មានខែចុងក្រោយ ក្នុងអាណត្តិរបស់លោក លោកប្រធានាធិបតី Joe Biden កំពុងបង្ហាញឆន្ទៈថ្មី ក្នុងការប្រើប្រាស់ជំនួយយោធារបស់សហរដ្ឋអាមេរិក សម្រាប់ប្រទេសអ៊ីស្រាអែល ទាំងជាការគាំទ្រ និងការព្រមាន ដើម្បីមានឥទ្ធិពលលើការប្រឈមមុខដាក់គ្នាដែលមានហានិភ័យខ្ពស់ជាមួយអ៊ីរ៉ង់ និងក្រុមសកម្មប្រយុទ្ធដែលគាំទ្រដោយអ៊ីរ៉ង់។

ប៉ុន្តែអ្នកជំនាញលើកឡើងថា ខណៈដែលវិធីសាស្រ្ត បង្កើនការពាក់ព័ន្ធរបស់ទីក្រុងវ៉ាស៊ីនតោន នៅក្នុងការសម្រេចចិត្តរបស់អ៊ីស្រាអែល ដែលមានរយៈពេលតែប៉ុន្មានសប្តាហ៍ នៅមុនការបោះឆ្នោតប្រធានាធិបតីអាមេរិកនោះ វាមិនច្បាស់ទេថា តើគោលដៅរបស់លោក Biden នឹងត្រូវសម្រេចបានដែរ ឬយ៉ាងណា ដោយក្នុងនោះមានរួមទាំងការទប់ស្កាត់ជម្លោះដ៏ទូលំទូលាយ ក្នុងតំបន់ និងការធ្វើឲ្យអ៊ីស្រាអែលព្រមដោះស្រាយស្ថានការណ៍មនុស្សធម៌ ដែលមានសភាពកាន់តែធ្ងន់ធ្ងរទៅៗ នៅក្នុងតំបន់ហ្កាហ្សា។

រដ្ឋបាលរបស់លោក Biden កាលពីថ្ងៃអាទិត្យចុងសប្ដាហ៍កន្លងមក បានប្រកាសថា ខ្លួននឹងបញ្ជូនទាហានប្រហែល ១០០នាក់ ទៅអ៊ីស្រាអែល រួមជាមួយនឹងប្រព័ន្ធប្រឆាំងមីស៊ីលកម្រិតខ្ពស់របស់សហរដ្ឋអាមេរិក ជាការដាក់ពង្រាយដ៏កម្រមួយដែលបានកើតមានឡើង នៅពេលដែលរដ្ឋាភិបាលរបស់នាយករដ្ឋមន្ត្រី លោក Benjamin Netanyahu ថ្លឹងថ្លែងពីការឆ្លើយតបសងសឹកលើអ៊ីរ៉ង់ បន្ទាប់ពីការវាយប្រហារដោយមីស៊ីលរបស់អ៊ីរ៉ង់ កាលពីថ្ងៃទី១ ខែតុលា។

ហើយនៅថ្ងៃអាទិត្យនោះដែរ រដ្ឋបាលលោក Biden ក៏បានផ្ញើលិខិតមួយច្បាប់ផងដែរទៅអ៊ីស្រាអែលថា ខ្លួនត្រូវតែចាត់វិធានការ ក្នុងខែក្រោយ ដើម្បីកែលម្អស្ថានភាពមនុស្សធម៌ នៅតំបន់ហ្កាហ្សា ឬបើមិនដូច្នោះទេ ត្រូវប្រឈមនឹងការរឹតបន្តឹងដែលអាចកើតមាន ជុំវិញជំនួយយោធារបស់សហរដ្ឋអាមេរិក៕