មហាសេដ្ឋីអចលនទ្រព្យវៀតណាមម្នាក់ ដែលត្រូវបានកាត់ទោសប្រហារជីវិតពីបទក្លែងបន្លំទឹកប្រាក់សរុបចំនួន ២៧ពាន់លានដុល្លារ នឹងត្រូវប្រឈមនឹងការកាត់ទោសមួយទៀតឲ្យជាប់ពន្ធនាគារអស់មួយជីវិត នាថ្ងៃព្រហស្បតិ៍ (ទី១៧ ខែតុលា) ក្នុងការកាត់ក្តីពាក់ព័ន្ធនឹងការចោទប្រកាន់ពីបទសម្អាតលុយកខ្វក់។

គួរបញ្ជាក់ថា អ្នកជំនួញផ្នែកអភិវឌ្ឍន៍អចលនទ្រព្យ លោកស្រី Truong My Lan ត្រូវបានរកឃើញថា មានទោស កាលពីខែមេសា ពីបទលួចបន្លំប្រាក់ពីធនាគារ Saigon Commercial Bank (SCB) ដែលរដ្ឋាអាជ្ញាបាននិយាយថា លោកស្រីជាអ្នកគ្រប់គ្រង នៅក្នុងសំណុំរឿងពុករលួយដ៏ធំបំផុតមួយ ក្នុងប្រវត្តិសាស្ត្រ ហើយត្រូវបានកាត់ទោសប្រហារជីវិត។

មនុស្សរាប់ម៉ឺននាក់ដែលបានវិនិយោគប្រាក់សន្សំរបស់ពួកគេ នៅក្នុងធនាគារនេះ បានបាត់បង់ប្រាក់ ដោយបានធ្វើឲ្យមានការភ្ញាក់ផ្អើលដល់ប្រទេសគ្រប់គ្រងដោយលទ្ធិកុម្មុយនីស្តមួយនេះ និងបង្កឲ្យមានការតវ៉ាដ៏កម្រពីជនរងគ្រោះ។

នៅថ្ងៃព្រហស្បតិ៍នេះ លោកស្រី Lan និងចុងចោទ ៣៣នាក់ផ្សេងទៀត ក្នុងនោះរួមមានទាំងប្ដី និងក្មួយស្រីរបស់លោកស្រីផងដែរ ត្រូវបាននាំខ្លួនទៅតុលាការក្នុងទីក្រុងហូជីមិញ តាមក្បួនរថយន្តនគរបាល។ ដោយមានពាក់ម៉ាស់មុខ លោកស្រី Lan បានអង្គុយនៅមុខតុលាការដែលមានអមដោយមន្ត្រីនគរបាល ២នាក់ ដើម្បីរង់ចាំស្ដាប់សាលក្រម បន្ទាប់ពីមានកាត់ទោសអស់រយៈពេល ៤សប្តាហ៍។

រដ្ឋអាជ្ញាបានអំពាវនាវឲ្យមានការផ្តន្ទាទោសលោកស្រី Lan ជាប់ពន្ធនាគាមួយជីវិតពីបទសម្អាតលុយកខ្វក់ ការជួញដូរប្រាក់ឆ្លងដែនខុសច្បាប់ និងការក្លែងបន្លំ។

មនុស្សប្រហែល ៣៦.០០០នាក់ដែលបានទិញមូលបត្របំណុលដែលចេញដោយ SCB ត្រូវបានកំណត់ថា ជាជនរងគ្រោះនៃអំពើក្លែងបន្លំនេះ៕