អ្នកនាំពាក្យក្រសួងការបរទេសអាមេរិក កាលពីថ្ងៃពុធ (ទី១៦ ខែតុលា) បាននិយាយថា កិច្ចប្រជុំ រវាងសហរដ្ឋអាមេរិក និងឥណ្ឌា ស្ដីអំពីការស៊ើបអង្កេតលើគម្រោងការមិនបានសម្រេច ដើម្បីសម្លាប់អ្នកបំបែកខ្លួនសាសនា Sikh នៅលើដែនដីអាមេរិក ទទួលបានលទ្ធផលជាផ្លែផ្កា ដោយបន្ថែមថា ទីក្រុងវ៉ាស៊ីនតោនពេញចិត្តនឹងកិច្ចសហប្រតិបត្តិការរបស់ឥណ្ឌា។

គួរបញ្ជាក់ថា ទីក្រុងវ៉ាស៊ីនតោនបានចោទប្រកាន់ថា ភ្នាក់ងារឥណ្ឌា បានជាប់ពាក់ព័ន្ធក្នុងផែនការប៉ុនប៉ងធ្វើឃាតលើមេដឹកនាំផ្តាច់ខ្លួនសាសនា Sikh លោក Gurpatwant Singh Pannun ក្នុងទីក្រុង New York កាលពីឆ្នាំមុន ហើយបានចោទប្រកាន់ជនជាតិឥណ្ឌាម្នាក់ដែលធ្វើការតាមបញ្ជារបស់មន្ត្រីរដ្ឋាភិបាលឥណ្ឌា ដែលមិនត្រូវបានបញ្ចេញឈ្មោះឲ្យដឹង។

អ្នកនាំពាក្យក្រសួងការបរទេសបានប្រាប់ថា គណៈកម្មាធិការរដ្ឋាភិបាលឥណ្ឌាដែលស៊ើបអង្កេតការជាប់ពាក់ព័ន្ធរបស់ឥណ្ឌា នៅក្នុងផែនការឃាតកម្មមិនបានសម្រេច បានជួបជាមួយមន្ត្រីសហរដ្ឋអាមេរិក ក្នុងទីក្រុងវ៉ាស៊ីនតោន កាលពីថ្ងៃអង្គារ (ទី១៥ ខែតុលា)។ ជាមួយគ្នានេះ សហរដ្ឋអាមេរិក បាន និងកំពុងជំរុញឲ្យប្រទេសឥណ្ឌាពិនិត្យមើលការអះអាងរបស់ក្រសួងយុត្តិធម៌អាមេរិក ដែលថា មន្ត្រីចារកម្មឥណ្ឌាម្នាក់ដែលមិនត្រូវបានបញ្ចេញឈ្មោះ បានដឹកនាំផែនការធ្វើឃាតលោក Pannun ដែលជាពលរដ្ឋមានសញ្ជាតិ២ អាមេរិក-កាណាដា។

ចំណែកប្រទេសកាណាដា កាលពីថ្ងៃចន្ទដើមសប្ដាហ៍នេះ បានបណ្តេញអ្នកការទូតឥណ្ឌា ដោយភ្ជាប់ពួកគេទៅនឹងការសម្លាប់មេដឹកនាំផ្តាច់ខ្លួនសាសនា Sikh លោក Hardeep Singh Nijjar នៅលើដែនដីកាណាដា។ ហើយឥណ្ឌាក៏បានបញ្ជាបណ្តេញអ្នកការទូតកាណាដាវិញដែរ និងបដិសេធការចោទប្រកាន់របស់កាណាដា។ ទីក្រុងវ៉ាស៊ីនតោនបាននិយាយថា ឥណ្ឌាមិនសហការជាមួយកាណាដានោះទេ៕