ប្រធានាធិបតីអាមេរិក លោក Joe Biden ចេញដំណើរទៅកាន់ទីក្រុងប៊ែរឡាំង នៅថ្ងៃព្រហស្បតិ៍ (ទី១៧ ខែតុលា) នេះ សម្រាប់ដំណើរទស្សនកិច្ចយ៉ាងឆាប់រហ័ស ដើម្បីពិភាក្សាអំពីការលុកលុយរបស់រុស្ស៊ីលើអ៊ុយក្រែន ជាមួយមេដឹកនាំអាល្លឺម៉ង់ បារាំង និងអង់គ្លេស ខណៈដែលទីក្រុងគីវ ជំរុញឲ្យសម្ព័ន្ធមិត្តលោកខាងលិចចាត់វិធានការជាបន្ទាន់ ដើម្បីបញ្ចប់ការប្រយុទ្ធគ្នា។

ជម្លោះដែលកំពុងរីករាលដាលយ៉ាងឆាប់រហ័ស នៅតំបន់មជ្ឈិមបូព៌ា ក៏ត្រូវបានគេរំពឹងផងដែរថា នឹងក្លាយបញ្ហាចម្បង នៅក្នុងរបៀបវារៈនៃសកិច្ចពិភាក្សា រវាងមេដឹកនាំទាំងនោះ ខណៈដែលកិច្ចខិតខំប្រឹងប្រែងការទូត ដើម្បីបញ្ឈប់ការប្រយុទ្ធគ្នា បានជាប់គាំង។

ដើមឡើយ លោក Biden គ្រោងនឹងកោះប្រជុំយ៉ាងទូលំទូលាយនៃប្រទេសអ្នកគាំទ្រយោធារបស់អ៊ុយក្រែន នៅឯមូលដ្ឋានទ័ពអាកាសអាមេរិក Ramstein ក្នុងប្រទេសអាល្លឺម៉ង់ កាលពីសប្តាហ៍មុន ក្នុងគម្រោងមានដំណើរទស្សនកិច្ចផ្លូវរដ្ឋរយៈពេល ៣ថ្ងៃទៅកាន់ប្រទេសអឺរ៉ុបមួយនេះ ដែលនឹងជាលើកដំបូង ក្នុងរយៈពេលជិត ៤០ឆ្នាំ។ តែលោកបានលុបចោលការធ្វើដំណើរនោះ ដើម្បីផ្តោតលើការដោះស្រាយការរងគ្រោះ និងផលប៉ះពាល់ដោយសារព្យុះសង្ឃរា Milton ហើយកំពុងរៀបចំកិច្ចពិភាក្សានេះ ជាមួយនឹងការស្នាក់នៅយ៉ាងឆាប់រហ័ស ក្នុងសប្តាហ៍នេះ។

ឥឡូវនេះ ប្រធានាធិបតីនឹងទៅដល់នៅល្ងាចថ្ងៃទី១៧ ខែតុលានេះ នៅទីក្រុងប៊ែរឡាំង ហើយជួបពិភាក្សាទ្វេភាគី នៅព្រឹកថ្ងៃទី១៨ ខែតុលា ជាមួយប្រធានាធិបតី និងអធិការបតីអាល្លឺម៉ង់ មុនពេលមានកិច្ចប្រជុំដែលបានគ្រោងទុក ជាមួយអ្វីដែលគេហៅថា ក្រុមប្រទេសតំបន់អឺរ៉ុប នាពេលរសៀល៕