មន្ត្រីក្រសួងការពារជាតិ នៅថ្ងៃព្រហស្បតិ៍ (ទី១៧ ខែតុលា) នេះ បាននិយាយថា ប្រទេសទួរគី បាន និងកំពុងដំណើរការការងារបច្ចេកទេស ក្នុងគោលបំណងពន្លឿនដល់ការទិញដែលបានគ្រោងទុករបស់ខ្លួននូវយន្តហោះចម្បាំង Eurofighter Typhoon (Typhoon)។

ទីក្រុង Ankara បាននិយាយកាលពីឆ្នាំមុនថា ខ្លួនកំពុងពិភាក្សាជាមួយសមាជិកសហព័ន្ធក្រុមហ៊ុនផលិតយន្តហោះចម្បាំង Eurofighter គឺចក្រភពអង់គ្លេស និងអេស្ប៉ាញ ដើម្បីទិញយន្តហោះចម្បាំង Typhoon ទោះបីជាអាល្លឺម៉ង់បានជំទាស់គំនិតនេះក៏ដោយ។ ចាប់តាំងពីពេលនោះមក ប្រទេសទួរគីបានរិះគន់ដល់កង្វះនូវការវិវត្តន៍លើបញ្ហានេះ ដោយសារការស្ទាក់ស្ទើររបស់ទីក្រុងប៊ែរឡាំង។

តែកាលពីខែមុន ប្រធានាធិបតីទួរគី លោក Tayyip Erdogan បានជួបជាមួយអធិការបតីអាល្លឺម៉ង់ លោក Olaf Scholz នៅខាងក្រៅមហាសន្និបាតអង្គការសហប្រជាជាតិ។ លោក Scholz គ្រោងនឹងជួបលោក Erdogan នាថ្ងៃសៅរ៍ចុងសប្ដាហ៍នេះ នៅទីក្រុង Istanbul ហើយបញ្ហាយន្តហោះចម្បាំងហនេះ ត្រូវបានគេរំពឹងថា នឹងត្រូវបានលើកយកមកពិភាក្សា។

រដ្ឋមន្ត្រីក្រសួងការពារជាតិ បានប្រាប់អ្នកសារព័ត៌មានថា៖ «ការងារកម្រិតបច្ចេកទេស សម្រាប់ការទិញយន្តហោះចម្បាំង Eurofighter Typhoon កំពុងដំណើរការទៅ។ ការងារទាំងនោះគឺមានគោលបំណងពន្លឿនដំណើរការនេះ។ មិនមានលក្ខខណ្ឌត្រូវបានលើកឡើង ក្នុងការដំណើរការនេះទេ»។

គួរបញ្ជាក់ថា យន្តហោះចម្បាំងប្រភេទ Eurofighter Typhoon ត្រូវបានបង្កើតឡើងដោយសហព័ន្ធក្រុមហ៊ុនរបស់ប្រទេសអាល្លឺម៉ង់ អង់គ្លេស អ៊ីតាលី និងអេស្ប៉ាញ ដែលតំណាងដោយក្រុមហ៊ុន Airbus, BAE Systems និង Leonardo៕