មន្រ្តីនគរបាលជាន់ខ្ពស់មួយរូប និយាយនៅថ្ងៃព្រហស្បតិ៍នេះថា មនុស្សយ៉ាងហោច ២៥នាក់ បានស្លាប់ និងមនុស្សជាច្រើននាក់ផ្សេងទៀត បានចូលសម្រាកព្យាបាលក្នុងមន្ទីរពេទ្យ ក្រោយទទួលទានស្រាខូចគុណភាពនៅរដ្ឋភាគខាងកើត Bihar ប្រទេសឥណ្ឌា ។

នគរបាលក្នុងស្រុក បានចាប់ខ្លួនមនុស្ស ២២នាក់ សម្រាប់ការជាប់ពាក់ព័ន្ធរបស់ពួកគេ ក្នុងការលក់ស្រាខូចគុណភាពនៅក្នុងរដ្ឋ Bihar ដែលបានហាមឃាត់ការលក់ និងការទិញស្រាមួយនេះ កាលពីឆ្នាំ ២០១៦ ។

រូបភាពវីដេអូឃ្លីបរបស់ទីភ្នាក់ងារព័ត៌មាន ANI ដែលទីភ្នាក់ងារព័ត៌មានរ៉យទ័រមានភាគហ៊ុនភាគច្រើននោះ ឃើញម្តាយយំសោកបោកខ្លួន ពេលមើលឃើញកូនប្រុសរបស់ខ្លួនស្លាប់ ក្រោយទទួលទានស្រាខូចគុណភាព ។

សូមបញ្ជាក់ថា ករណីស្លាប់ដោយសារស្រាផលិតខុសច្បាប់ តែងតែកើតឡើងញឹកញាប់នៅក្នុងប្រទេសឥណ្ឌា ជាទីដែលពលរដ្ឋភាគច្រើនគ្មានលទ្ធភាពទិញស្រាមានម៉ាកយីហោត្រឹមត្រូវនោះ ៕