ប្រធានក្រុមប្រឹក្សាអឺរ៉ុបលោក Charles Michel បាននិយាយប្រាប់ក្រុមអ្នកសារព័ត៌មាននៅថ្ងៃព្រហស្បតិ៍នេះ មុនជំនួបក្រុមមេដឹកនាំសហភាពអឺរ៉ុប(EU)ក្នុងទីក្រុងព្រុចសែល ប្រទេសបែលហ្ស៊ិកថា EU ត្រូវការពន្លឿនការគាំទ្ររបស់ពួកគេចំពោះអ៊ុយក្រែន ទាំងផ្នែកយោធា និងហិរញ្ញវត្ថុ ។

លោកនិយាយថា សម្រាប់ EU ពួកយើងឈរនៅខាងអ្នក ដរាបណាសង្រ្គាមនៅតែបន្ត និងអ្វីក៏ដោយឲ្យតែអ្នកត្រូវការ ។

នៅថ្ងៃព្រហស្បតិ៍នេះដែរ ប្រធានាធិបតីអ៊ុយក្រែនលោក Volodymyr Zelenskiy បានយកផែនការជ័យជំនះរបស់លោកប្រគល់ជូនប្រមុខប្លុកមួយនេះ ដោយលោកបានបញ្ចុះបញ្ចូលសុំបង្កើនការគាំទ្រផ្នែកយោធាច្រើនបន្ថែមទៀត សម្រាប់យុទ្ធនាការរបស់ទីក្រុងគីវ ប្រឆាំងនឹងការវាយលុករបស់រុស្ស៊ី ។

លោក Zelenskiy បានបង្ហាញផែនការរបស់លោកដល់សភាអ៊ុយក្រែន កាលពីថ្ងៃពុធចំពេលចាំបាច់ ខណៈកងកម្លាំងរុស្ស៊ី រុលទៅកាន់តំបន់ភាគខាងកើត រដូវរងាកាន់តែជិតខិតចូលមកដល់ ហើយការបោះឆ្នោតរបស់សហរដ្ឋអាមេរិក បង្កភាពមិនច្បាស់លាស់ចំពោះអនាគតនៃការគាំទ្ររបស់លោកខាងលិច ។

លោក Zelenskiy បាននិយាយប្រាប់ក្រុមអ្នកសារព័ត៌មាននៅថ្ងៃព្រហស្បតិ៍នេះថា ផែនការនេះ ពុំអាស្រ័យលើបំណងចង់បានរបស់រុស្ស៊ីនោះទេ គឺវាផ្អែកលើបំណងចង់បានរបស់ដៃគូរបស់ពួកយើង ហើយខ្ញុំគិតថា នេះនឹងផ្តល់ឱកាសដើម្បីធ្វើឲ្យផែនការនេះ ក្លាយជាការពិត ៕