សមាជិកក្រុមហេសបូឡានៅក្នុងសភាលីបង់ និយាយនៅថ្ងៃព្រសហ្បតិ៍នេះថា ថ្នាក់ដឹកនាំក្រុមហេសបូឡា កំពុងសម្របសម្រួលយ៉ាងប្រុងប្រយ័ត្នជាមួយប្រធានសភាលីបង់លោក Nabih Berri ក្នុងកិច្ចខិតខំទទួលបានបទឈប់បាញ់នៅក្នុងសង្រ្គាមជាមួយកងកម្លាំងអ៊ីស្រាអែល ។ 

លោកបន្តថា ទាហានអ៊ីស្រាអែល ពុំបានគ្រប់គ្រងភូមិណាមួយនៅតំបន់ភាគខាងត្បូងលីបង់នោះទេ ។

អ៊ីស្រាអែល ពុំបានបង្ហាញសញ្ញាណាមួយនៃការបន្ធូរបន្ថយយុទ្ធនាការសឹករបស់ពួកគេប្រឆាំងក្រុមហេសបូឡានៅប្រទេសលីបង់នោះឡើយ ក្រោយធ្វើឃាតក្រុមមេដឹកនាំរបស់ពួកគេជាច្រើននាក់ និងក្រុមហាម៉ាស់នៅតំបន់ហ្កាហ្សា ហើយពួកគេសន្យាថានឹងដាក់ទោសអ៊ីរ៉ង់ សម្រាប់ការវាយប្រហារដោយមីស៊ីលលើអ៊ីស្រាអែលកាលពីថ្ងៃទី ១ ខែតុលាកន្លងទៅ ។

អ៊ីស្រាអែល និយាយថា ប្រតិបត្តិការជើងគោករបស់ពួកគេមកទល់នឹងពេលនេះ បានសម្លាប់ក្រុមសកម្មប្រយុទ្ធហេសបូឡាជាច្រើននាក់ ហើយទាហានរបស់ពួកគេ រឹបអូសបានអាវុធរាប់ពាន់ដើម និងបំផ្លាញលេណដ្ឋាន និងផ្លូវរូងក្រោមដីរបស់ពួកគេនៅក្រោមភូមិជាច្រើនកន្លែង ស្ថិតក្នុងតំបន់ភាគខាងត្បូងលីបង់ ។

យោងតាមការអះអាងរបស់ក្រសួងសុខាភិបាលលីបង់ បានឲ្យដឹងថា ប្រតិបត្តិការសឹករបស់អ៊ីស្រាអែលនៅលីបង់ បានសម្លាប់មនុស្សយ៉ាងហោច ២.៣៥០នាក់ ក្នុងរយៈពេលជាង ១ឆ្នាំកន្លងមកនេះ ដែលភាគច្រើននៃពួកគេ បានស្លាប់ក្នុងរយៈពេលថ្មីៗនេះ ហើយមនុស្សជាង ១,២លាននាក់ផ្សេងទៀត បានរត់ភៀសខ្លួន ៕