អាមេរិក៖ សហរដ្ឋអាមេរិកបាននិយាយនៅថ្ងៃអាទិត្យថា ជំនួបទល់មុខគ្នាលើកដំបូងរវាងក្រុមមន្ត្រីជាន់ខ្ពស់អាមេរិក និងតាលីបង់ ចាប់តាំងពីក្រុមប្រកាន់តឹងនេះបានដណ្តើមកាន់កាប់អំណាចឡើងវិញ នៅប្រទេសអាហ្វហ្គានីស្ថានគឺមានភាពស្មោះត្រង់ និងប្រកបដោយវិជ្ជាជីវៈ ហើយភាគីអាមេរិកបានបញ្ជាក់ជាថ្មីថា ក្រុមតាលីបង់នឹងត្រូវបានវិនិច្ឆ័យលើសកម្មភាពរបស់ពួកគេ មិនមែនត្រឹមតែពាក្យសំដីរបស់ពួកគេទេ។
សេចក្ដីថ្លែងការណ៍មួយរបស់ក្រសួងការបរទេសអាមេរិកបាននិយាយថា គណៈប្រតិភូអាមេរិកនៅក្នុងកិច្ចពិភាក្សាចុងសប្តាហ៍នៅទីក្រុងដូហាប្រទេសកាតា បានផ្តោតលើការព្រួយបារម្ភអំពីសន្តិសុខ និងភេរវកម្ម និងការធ្វើដំណើរប្រកបដោយសុវត្ថិភាពសម្រាប់ពលរដ្ឋអាមេរិក ជនបរទេស និងជនជាតិអាហ្វហ្គានីស្ថានដទៃទៀតព្រមទាំងសិទ្ធិមនុស្ស រួមទាំងការចូលរួមប្រកបដោយអត្ថន័យរបស់ស្ត្រី និងក្មេងស្រីនៅក្នុងគ្រប់ទិដ្ឋភាពទាំងអស់នៃសង្គមអាហ្វហ្គានីស្ថាន។ សេចក្ដីថ្លែងការណ៍ខាងលើនិយាយថា ភាគីទាំងពីរក៏បានពិភាក្សាអំពីជំនួយមនុស្សធម៌របស់អាមេរិកដល់ប្រជាជនអាហ្វហ្គានីស្ថានផងដែរ។
សេចក្ដីថ្លែងការណ៍ដដែលនោះបាននិយាយថា ការពិភាក្សានេះមានភាពស្មោះត្រង់ និងប្រកបដោយវិជ្ជាជីវៈជាមួយគណៈប្រតិភូអាមេរិក ដោយបញ្ជាក់ជាថ្មីថា តាលីបង់នឹងត្រូវបានវិនិច្ឆ័យលើសកម្មភាពរបស់ខ្លួន មិនត្រឹមតែពាក្យសម្តីរបស់ខ្លួនប៉ុណ្ណោះទេ។ កាលពីថ្ងៃសៅរ៍ រដ្ឋមន្ត្រីការបរទេសស្ដីទីរបស់អាហ្វហ្គានីស្ថានបានប្រាប់សារព័ត៌មាន Al Jazeera ថា តំណាងតាលីបង់បានស្នើសុំសហរដ្ឋអាមេរិកក្នុងកិច្ចពិភាក្សា ឲ្យដកបម្រាមលើប្រាក់បម្រុងរបស់ធនាគារកណ្តាលអាហ្វហ្គានីស្ថាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
