ក្រុមគ្រួសាររបស់ចំណាប់ថ្នូរអ៊ីស្រាអែល ដែលត្រូវបានចាប់ខ្លួនទៅតំបន់ហ្កាហ្សា ដោយក្រុមអ៊ីស្លាមហាម៉ាស បារម្ភពីសុវត្ថិភាព និងជីវិតរបស់មនុស្សជាទីស្រលាញ់របស់ពួកគេថាអាចស្ថិតក្នុងគ្រោះថ្នាក់កាន់តែខ្លាំង បន្ទាប់ពីទាហានអ៊ីស្រាអែល បានសម្លាប់មេដឹកនាំក្រុមសកម្មប្រយុទ្ធមួយនេះ គឺលោក យ៉ាយ៉ា ស៊ីនវ៉ា (Yahya Sinwar)។

អ្នកស្រុកម្នាក់ ដែលកូនប្រុសរបស់ខ្លួនត្រូវបានចាប់អំឡុងថ្ងៃវាយប្រហារ ៧តុលា របស់ក្រុមហាម៉ាស បាននិយាយថា៖ «យើងបានជម្រះបញ្ជីជាមួយមេឃាតករ Sinwar រួចហើយ ប៉ុន្តែឥឡូវនេះជីវិតរបស់អ្នកដែលត្រូវបានចាប់ខ្លួនគឺកាន់តែមានគ្រោះថ្នាក់»។

អ្នកស្រុកជាច្រើនទៀត បាននិយាយបន្ទាប់ពីព័ត៌មាននៃការស្លាប់របស់លោក Sinwar បានផុសឡើងកាលពីថ្ងៃព្រហស្បតិ៍ថា “ទោះជាសម្លាប់មេដឹកនាំហាម៉ាសបាន ក៏មិនមានជ័យជម្នះទាំងស្រុងដែរ ប្រសិនបើមិនជួយសង្គ្រោះជីវិតចំណាប់ខ្មាំង ហើយនាំពួកគេទាំងអស់មកវិញទេនោះ”។

រហូតមកដល់ពេលនេះ ចំណាប់ខ្មាំងនៅហ្កាហ្សាចំនួន ១១៧នាក់ ត្រូវបានបញ្ជូនទៅវិញទាំងរស់ រួមទាំងមនុស្ស ៤នាក់ ដែលត្រូវបានរំដោះនៅពេលចាប់ផ្តើមនៃសង្រ្គាមហ្កាហ្សា ដោយមាន ១០៥នាក់ ដែលភាគច្រើនជាស្ត្រី, កុមារ និងជនបរទេស បានត្រឡប់មកវិញកាលពីខែវិច្ឆិកា ឆ្នាំមុន ក្នុងអំឡុងពេលបទឈប់បាញ់ជាមួយក្រុមហាម៉ាស និង ៨នាក់ត្រូវបានជួយសង្គ្រោះដោយយោធា។

ចំណាប់ខ្មាំង ៣៧នាក់ ត្រូវបាននាំយកមកវិញតែសាកសពប៉ុណ្ណោះ។ នោះធ្វើឱ្យចំណាប់ថ្នូរចំនួន ១០១នាក់ នៅតែស្ថិតក្នុងតំបន់ហ្កាហ្សា ដែលអ៊ីស្រាអែល ជឿថាយ៉ាងហោចណាស់ពាក់កណ្ដាលនៃអ្នកទាំងនោះនៅមានជីវិត៕