ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃសុក្រ (១៨ តុលា) នេះថា មេដឹកនាំកូរ៉េខាងជើង លោក គីម ជុងអ៊ុន បញ្ជាក់ជំហររបស់ខ្លួនម្ដងទៀតថា កូរ៉េខាងត្បូង គឺជាប្រទេសបរទេស និងជាប្រទេសអរិភាព។

ការលើកឡើងនេះកើតឡើងមួយថ្ងៃបន្ទាប់ពីប្រព័ន្ធផ្សព្វផ្សាយ KCNA បាននិយាយថា សភាជាតិរបស់កូរ៉េខាងជើង បានធ្វើវិសោធនកម្មរដ្ឋធម្មនុញ្ញដើម្បីកំណត់ប្រទេសកូរ៉េខាងត្បូង ថាជា “រដ្ឋអរិភាព” ស្របតាមការប្តេជ្ញារបស់លោក គីម ក្នុងការទម្លាក់ចោលការបង្រួបបង្រួមនៃកូរ៉េទាំងពីរជាគោលដៅជាតិ។

លោក គីម ក៏បាននិយាយថា ការប្រែប្រួលមិនទៀងរបស់សម្ព័ន្ធភាពកូរ៉េខាងត្បូង-សហរដ្ឋអាមេរិក រួមទាំងសមយុទ្ធយោធាដែលកាន់តែញឹកញាប់ឡើង និងសម្បូរបែបរបស់ប្រទេសទាំងពីរ បានបង្ហាញពីសារៈសំខាន់នៃការរារាំងនុយក្លេអ៊ែររបស់កូរ៉េខាងជើងកាន់តែខ្លាំងថែមទៀត។

ចំពោះការបំផ្ទុះផ្លូវដែក និងផ្លូវដែករបស់កូរ៉េខាងជើងជាមួយកូរ៉េខាងត្បូងក្នុងសប្តាហ៍នេះវិញ លោក គីម បាននិយាយថា នោះមានន័យថា “មិនត្រឹមតែជាការបិទជាក់ស្ដែងប៉ុណ្ណោះទេ ប៉ុន្តែក៏ជាការបញ្ចប់ទំនាក់ទំនងអាក្រក់ជាមួយទីក្រុងសេអ៊ូលផងដែរ” ក៏ដូចជា “ការដកចេញទាំងស្រុងនៃគំនិតមិនសមហេតុផលក្នុងការបង្រួបបង្រួមជាតិ”។

ទីក្រុងព្យុងយ៉ាង បាននិយាយកាលពីសប្តាហ៍មុនថា ខ្លួននឹងកាត់ផ្តាច់ផ្លូវអន្តរកូរ៉េទាំងស្រុង និងពង្រឹងរាំងការពារនៅម្ខាងនៃព្រំដែនរបស់ខ្លួន ដែលជាផ្នែកមួយនៃការជំរុញកូរ៉េខាងជើងសម្រាប់ប្រព័ន្ធ “"រដ្ឋពីរ” ដែលលុបចោលនូវគោលដៅនៃការបង្រួបបង្រួមដ៏យូររបស់ខ្លួន៕