សហរដ្ឋអាមេរិក កាលពីថ្ងៃព្រហស្បតិ៍ បានដាក់ទណ្ឌកម្មលើក្រុមហ៊ុនចិនចំនួនពីរ និងសាខារបស់រុស្ស៊ី ដែលពាក់ព័ន្ធទៅនឹងការផលិត និងដឹកជញ្ជូនយានដ្រូនវាយប្រហារ ហើយបានព្រមានប្រទេសទាំងពីរឱ្យបញ្ឈប់កិច្ចសហប្រតិបត្តិការដែលជំរុញកិច្ចខិតខំប្រឹងប្រែងសង្គ្រាមនៅប្រទេសអ៊ុយក្រែន។

ក្រសួងរតនាគារសហរដ្ឋអាមេរិក បាននិយាយថា ទណ្ឌកម្មថ្មី បានដាក់គោលដៅលើក្រុមហ៊ុនចិន Xiamen Limbach Aircraft Engine Co Ltd ដែលផលិតម៉ាស៊ីនបំពាក់លើយានដ្រូនរយៈចម្ងាយឆ្ងាយស៊េរី Garpiya របស់រុស្ស៊ី។

វិធានការនេះ ក៏បានប៉ះពាល់ដល់ក្រុមហ៊ុន Redlepus Vector Industry Shenzhen Co Ltd មានមូលដ្ឋាននៅប្រទេសចិន សម្រាប់ការជាប់ពាក់ព័ន្ធរបស់ក្រុមហ៊ុននេះក្នុងការដឹកជញ្ជូនយានដ្រូន និងបុគ្គលិក ព្រមទាំងជាប់ពាក់ព័ន្ធជាមួយក្រុមហ៊ុនរុស្ស៊ី។

យានដ្រូន ត្រូវបានគេជឿថា ត្រូវបានគេប្រើប្រាស់ប្រឆាំងគោលដៅយោធា និងគោលដៅជនស៊ីវិលក្នុងប្រទេសអ៊ុយក្រែន ដោយបានបំផ្លាញហេដ្ឋារចនាសម្ព័ន្ធសំខាន់ៗ និងបណ្តាលឱ្យមានអ្នកស្លាប់ និងរបួស រួមមានទាំងជនស៊ីវិល និងយោធា។

សារព័ត៌មាន Reuters បានរាយការណ៍លើកដំបូងកាលពីខែមុនថា យានដ្រូនរបស់រុស្ស៊ីថ្មីនេះ ត្រូវបានផលិតឡើងដោយប្រើប្រាស់ម៉ាស៊ីន និងគ្រឿងបន្លាស់របស់ចិន។