ព្រឹទ្ធសភារបស់ប្រទេសកេនយ៉ា បានបោះឆ្នោតដកអនុប្រធានាធិបតី លោក Rigathi Gachagua ចេញពីតំណែង ដោយការចោទប្រកាន់លើបទចោទប្រកាន់ចំនួន៥ក្នុងចំណោមបទចោទប្រកាន់ចំនួន១១ទៅលើលោក កាលពីថ្ងៃព្រហស្បតិ៍ ទី១៧ តុលា នៅក្នុងចំណាត់ការពុំធ្លាប់មានពីមុនមក ដែលប្រឈមហានិភ័យរុញច្រានប្រទេសនេះ ឈានទៅរកវិបត្តិនយោបាយ។

រដ្ឋសភា បានបោះឆ្នោតកាលពីសប្តាហ៍មុន ដើម្បីចោទប្រកាន់ លោក Gachagua ដែលបានជួយប្រធានាធិបតី លោក William Ruto ទទួលជ័យជម្នះក្នុងការបោះឆ្នោតកាលពីពីរឆ្នាំមុន ប៉ុន្តែត្រូវបានរិះគន់ដោយសម្ព័ន្ធមិត្តរបស់ប្រធានាធិបតី ជុំវិញការចោទប្រកាន់ថាមានភាពមិនស្មោះត្រង់ និងការបញ្ចេញមតិបង្កហេតុជាសាធារណៈ ជាបន្តបន្ទាប់។

សមាជិកព្រឹទ្ធសភាចំនួន៥៤រូប ក្នុងចំណោម៦៧ រូប បានបោះឆ្នោតដកលោក Gachagua លើសាច់រឿងដំបូងនៃ «ការរំលោភលើរដ្ឋធម្មនុញ្ញ» ។

ទោះជាយ៉ាងណា ដំណើរការនេះ ទំនងជាមិនបញ្ឈប់ នោះទេ។ លោក Gachagua បានដាក់ញត្តិជាច្រើន ប្រឈមមុខទៅនឹងការជំរុញឱ្យមានការបណ្តេញលោកចេញ ហើយប្រធានតុលាការ បានតែងតាំងគណៈកម្មការចៅក្រមចំនួនបីរូប ដើម្បីពិនិត្យមើល។

លោក Gachagua ដែលបានច្រានចោលការចោទប្រកាន់ ត្រូវកំណត់ពេលចូលការពារខ្លួនប្រឆាំងបទចោទប្រកាន់នៅក្នុងព្រឹទ្ធសភា កាលពីរសៀលថ្ងៃព្រហស្បតិ៍ មុនពេលបោះឆ្នោត។

នៅពេលដែលលោក Gachagua ខកខានមិនបានបង្ហាញខ្លួន មេធាវីរបស់លោកឈ្មោះ Paul Muite បាននិយាយថា លោកអនុប្រធានាធិបតី បានចូលសម្រាកនៅមន្ទីរពេទ្យដោយឈឺទ្រូងខ្លាំង ដោយទទូចឱ្យព្រឹទ្ធសភា ផ្អាកដំណើរការនីតិវិធីរយៈពេលពីរបីថ្ងៃ។ ប៉ុន្តែព្រឹទ្ធសភា បានបដិសេធមិនធ្វើដូច្នេះ ដែលជំរុញឱ្យក្រុមអ្នកច្បាប់របស់ លោក Gachagua ចាកចេញពីការជម្រះក្តី ជាការតវ៉ា។