លោក Fu Cong អ្នកតំណាងអចិន្ត្រៃយ៍របស់ប្រទេសចិនប្រចាំនៅអង្គការសហប្រជាជាតិ (UN) បាននិយាយថា មិនអាចទទួលយកបានទេក្នុងការបណ្តោយឱ្យសោកនាដកម្មបន្តនៅតំបន់ហ្កាហ្សា បើពុំនោះសោតក្រុមប្រឹក្សាសន្តិសុខអង្គការសហប្រជាជាតិ ដែលជាអង្គភាពរួម នៅតែបាត់បង់សមត្ថភាព។

ការរីកធំភ្លាមៗនៃស្ថានភាពជម្លោះរវាងប្រទេសលីបង់ និងអ៊ីស្រាអែល ក្នុងរយៈពេលប៉ុន្មានថ្ងៃកន្លងទៅនេះ បានបង្កឱ្យមានការព្រួយបារម្ភរាលដាលនៅក្នុងសហគមន៍អន្តរជាតិ។ លោក Fu បាននិយាយនៅក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខស្តីពីវិបត្តិមនុស្សធម៌នៅតំបន់ហ្កាហ្សាថា ក្នុងពេលជាមួយគ្នានេះ ស្ថានភាពនៅតំបន់ហ្កាហ្សា មិនបង្ហាញសញ្ញាណាមួយនៃស្ថេរភាពនោះទេ ប៉ុន្តែបានបន្តកាន់តែយ៉ាប់យ៉ឺន។

លោកបាននិយាយថា ក្នុងរយៈពេលពីរសប្តាហ៍កន្លងទៅនេះ អ៊ីស្រាអែលបានវាយប្រហារ និងបាញ់ផ្លោងឥតឈប់ឈរទៅលើសាលារៀន និងមន្ទីរពេទ្យ កាត់ផ្តាច់ការផ្គត់ផ្គង់ជំនួយមនុស្សធម៌ទាំងស្រុងទៅកាន់តំបន់ហ្កាហ្សាភាគខាងជើង ហើយបានបញ្ជាឱ្យប្រជាជនជម្លៀសខ្លួនជាបន្ទាន់ម្តងហើយម្តងទៀតសម្រាប់ប្រជាជនរាប់សែននាក់។

ដោយបានបញ្ជាក់ថា ក្រុមប្រឹក្សាសន្តិសុខ មានទំនួលខុសត្រូវក្នុងការរក្សាសន្តិភាព លោក Fu បានអំពាវនាវឱ្យការពារ និងធ្វើឱ្យដំណើរការឡើងវិញនូវប្រសិទ្ធភាពនៃសេចក្តីសម្រេចរបស់ក្រុមប្រឹក្សាសន្តិសុខ។

លោក Fu និយាយថា ការអនុវត្តដំណោះស្រាយរដ្ឋពីរ និងការបង្កើតរដ្ឋប៉ាឡេស្ទីនឯករាជ្យ គឺជាមធ្យោបាយតែមួយគត់ដើម្បីដោះស្រាយបញ្ហាប៉ាឡេស្ទីន។ ការអនុវត្តដំណោះស្រាយរដ្ឋទាំងពីរ ទាមទារឆន្ទៈនយោបាយរបស់ភាគីទាំងពីរ ដោយជំរុញឱ្យអ៊ីស្រាអែលបញ្ឈប់ការបំផ្លាញ និងបង្កគ្រោះថ្នាក់ដល់មូលដ្ឋាននៃដំណោះស្រាយរដ្ឋពីរ ហើយត្រឡប់ទៅរកផ្លូវត្រឹមត្រូវនៃដំណោះស្រាយ។