កម្មវិធីស្បៀងអាហារពិភពលោក និងអង្គការស្បៀងអាហារនិងកសិកម្ម បាននិយាយកាលពីថ្ងៃព្រហស្បតិ៍ថា ការរកឃើញចុងក្រោយនៃរបាយការណ៍ចំណាត់ថ្នាក់ដំណាក់កាលរួមបញ្ចូលគ្នា (IPC) ធ្វើបញ្ជាក់ ច្បាស់ថា ហានិភ័យនៃគ្រោះទុរ្ភិក្ស នៅតែបន្តកើតមាន នៅទូទាំងតំបន់ហ្កាហ្សាស្ទ្រីប។

លោក Stephane Dujarric អ្នកនាំពាក្យរបស់អគ្គលេខាធិការ UN បាននិយាយនៅក្នុងសន្និសីទសារព័ត៌មានប្រចាំថ្ងៃថា៖«ដោយសារការកើនឡើងនៃអរិភាពនាពេលថ្មីៗនេះ មានការព្រួយបារម្ភកាន់តែខ្លាំងឡើងថា ស្ថានភាពដ៏អាក្រក់បំផុត អាចកើតមានឡើងយ៉ាងពិតប្រាកដ»។

នៅចន្លោះខែកញ្ញា និងខែតុលា ឆ្នាំ ២០២៤ ទឹកដីនេះទាំងមូល ត្រូវបានចាត់ថ្នាក់ក្នុង គ្រាអាសន្នដំណាក់កាលទី៤។ មនុស្សប្រហែល ១,៨៤លាននាក់ នៅទូទាំងតំបន់ហ្កាហ្សាស្ទ្រីប កំពុងជួបប្រទះអសន្តិសុខស្បៀងក្នុងកម្រិតខ្ពស់ដែលត្រូវបានចាត់ថ្នាក់ក្នុងដំណាក់កាលរួមបញ្ចូលគ្នា (IPC) គឺវិបត្តិដំណាក់កាល ទី៣ ឬខ្ពស់ជាងនេះ រួមទាំងមនុស្សជិត ១៣៣.០០០នាក់ ដែលកំពុងប្រឈមមុខនឹងអសន្តិសុខស្បៀង ដ៏មហន្តរាយ ក្នុងដំណាក់កាលទី៥។

លោក Dujarric បាននិយាយថា កង្វះអាហារូបត្ថម្ភដ៏ស្រួចស្រាល គឺខ្ពស់ជាង ១០ដង មុនពេលការកើនឡើងនៃអរិភាព។ របាយការណ៍ បានបញ្ជាក់ថា ប្រជាជនស្ទើរតែទាំងអស់ នៅក្នុងតំបន់ហ្កាហ្សា ត្រូវបានផ្លាស់ទីលំនៅជាច្រើនដង ដោយប្រថុយនឹងការរងរបួស ឬស្លាប់ដោយសារការបាញ់ផ្លោង និងការវាយប្រហារតាមអាកាស ខណៈដែលក្រុមដែលងាយរងគ្រោះជាច្រើន មិនអាចផ្លាស់ប្តូរទីលំនៅ ឬស្វែងរកទីជម្រកដែលមានសុវត្ថិភាព។