រដ្ឋមន្ត្រីកូរ៉េខាងត្បូងទទួលបន្ទុកកិច្ចការអន្តរកូរ៉េកាលពីថ្ងៃព្រហស្បតិ៍ បានពណ៌នាការបង្រួបបង្រួមឧបទ្វីបកូរ៉េថា ជាកាតព្វកិច្ចផ្នែក«សីលធម៌» ខណៈដែលប្រទេសកូរ៉េខាងជើង បានគេចចេញពីគំនិតនៃការបង្រួបបង្រួម និងកំណត់ភាគខាងត្បូងថា ជា «រដ្ឋអរិភាព» នៅក្នុងរដ្ឋធម្មនុញ្ញរបស់ខ្លួន។

រដ្ឋមន្ត្រីបង្រួបបង្រួមលោក Kim Yung-ho បានធ្វើការអត្ថាធិប្បាយក្នុងអំឡុងពេលធ្វើបាឋកថា ក្នុងទីក្រុងវ៉ាស៊ីនតោន បន្ទាប់ពីប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាង បានបញ្ជាក់ក្នុងសប្តាហ៍នេះថា ច្បាប់ជាមូលដ្ឋានរបស់រដ្ឋឯកកោនេះ «កំណត់»កូរ៉េខាងត្បូងយ៉ាងច្បាស់ថា ជាប្រទេសអរិភាព ជាជាងដៃគូសម្រាប់កិច្ចសហប្រតិបត្តិការ។

លោក Kim Yung-ho ក៏បានគូសបញ្ជាក់ផងដែរថា ការលុបចោលឯកសារយោងនៃការបង្រួបបង្រួមរបស់កូរ៉េខាងជើង ឆ្លុះបញ្ចាំងពីការទទួលស្គាល់របស់កូរ៉េខាងជើងចំពោះការជឿនលឿនជាតិដ៏ជោគជ័យនៅក្នុងប្រទេសកូរ៉េខាងត្បូង និងអារម្មណ៍នៃ«ការបរាជ័យ» នៅក្នុងការប្រកួតប្រជែងជាមួយអ្នកជិតខាងភាគខាងត្បូងរបស់ខ្លួន។

លោកបាននិយាយក្នុងអំឡុងពេលធ្វើបាឋកថានៅវិទ្យាស្ថានសម្រាប់ការសិក្សាកូរ៉េនៃសាកលវិទ្យាល័យ George Washington ថា៖«នេះ គឺជាការពិតដែលមានភាពចម្រូងចម្រាសជុំវិញបញ្ហានៃការបង្រួបបង្រួម ប៉ុន្តែអ្វីដែលខ្ញុំចង់ប្រាប់អ្នកនោះ គឺថា សម្រាប់ប្រជាជនកូរ៉េខាងត្បូង ការបង្រួបបង្រួម គឺជាកាតព្វកិច្ចផ្នែកសីលធម៌»។

លោកបានបន្ថែមថា៖«ខ្ញុំជឿថា យើងត្រូវដោះស្រាយបញ្ហាបង្រួបបង្រួមពីទស្សនៈនៃកាតព្វកិច្ចផ្នែកសីលធម៌ និងទស្សនវិស័យផ្តោតទៅលើគុណតម្លៃ ដោយមិនគិតពីផលប្រយោជន៍សេដ្ឋកិច្ច»។