ប្រធានាធិបតីអាមេរិកលោក Joe Biden នៅថ្ងៃសុក្រ (ទី១៨ ខែតុលា) នេះ នឹងស្វែងរកការពង្រឹងកិច្ចសហប្រតិបត្តិការជាមួយដៃគូអឺរ៉ុបសំខាន់ៗ ជុំវិញបញ្ហានានា រាប់ពីសង្គ្រាមអ៊ុយក្រែន រហូតដល់ជម្លោះ នៅតំបន់មជ្ឈិមបូព៌ា អំឡុងទស្សនកិច្ចដែលអាចជាដំណើរផ្លូវការចុងក្រោយ នៅទីក្រុងប៊ែរឡាំង ប្រទេសអាល្លឺម៉ង់។

លោក Biden ដែលព្យាយាមធ្វើឲ្យប្រសើរឡើងនូវទំនាក់ទំនងជាមួយអឺរ៉ុប បន្ទាប់ពីការកាន់តំណែងប្រធានាធិបតីរបស់លោក Donald Trump ឆ្នាំ២០១៧-២០២១ នឹងត្រូវបានស្វាគមន៍ ដោយរបងកិត្តិយសយោធា មុនទទួលបានគ្រឿងឥស្សរិយយសថ្នាក់ខ្ពស់បំផុតរបស់ប្រទេសអាល្លឺម៉ង់ពីប្រធានាធិបតី លោក Frank-Walter Steinmeier។

ដំណើរទស្សនកិច្ចមួយយប់របស់លោក Biden វ័យ ៨១ឆ្នាំ កើតមានឡើងក្នុងរយៈពេលប៉ុន្មានសប្តាហ៍មុនការបោះឆ្នោតប្រធានាធិបតីអាមេរិក ដែលបេក្ខជនមកពីគណបក្សសាធារណរដ្ឋ លោក Trump កំពុងប្រឹងប្រែង ដើម្បីបានជាប់ឆ្នោតឡើងវិញ នៅក្នុងការប្រកួតប្រជែងដ៏ក្តៅគគុក ទល់នឹងអនុប្រធានាធិបតី លោកស្រី Kamala Harris ដែលជាបេក្ខជនខាងគណបក្សប្រជាធិបតេយ្យ។

នៅប្រទេសអាល្លឺម៉ង់នេះ លោកប្រធានាធិបតីដែលបានដកខ្លួនចេញពីការប្រកួតប្រជែង ហើយគាំទ្រលោកស្រី Harris ក្នុងខែកក្កដា គ្រោងនឹងជួបពិភាក្សាបិទទ្វារជាមួយអធិការបតី លោក Olaf Scholz នាពេលព្រឹកព្រលឹម ដើម្បីពិភាក្សាអំពីបញ្ហាសន្តិសុខ ពាណិជ្ជកម្ម និងបញ្ហាសេដ្ឋកិច្ចផ្សេងទៀត មុនពេលទទួលទានអាហារថ្ងៃត្រង់ជាមួយគ្នា។

នាពេលរសៀលថ្ងៃនេះ នាយករដ្ឋមន្ត្រីអង់គ្លេស លោក Keir Starmer និងប្រធានាធិបតីបារាំង លោក Emmanuel Macron គ្រោងនឹងធ្វើដំណើរកាន់ទីក្រុងប៊ែរឡាំង ដើម្បីចូលរួមជាមួយមេដឹកនាំទាំង២ សម្រាប់កិច្ចពិភាក្សាដែលផ្តោតជាសំខាន់លើវិធីបញ្ចប់ការប្រយុទ្ធគ្នា នៅអ៊ុយក្រែន៕