សង្គ្រាមអ៊ីស្រាអែលដែលកំពុងបន្តលើក្រុមហេសបូឡា នៅលីបង់ បង្កជាបញ្ហាដ៏ធ្ងន់ធ្ងរ៖ តើស៊ីរីនឹងត្រូវបានទាញចូលក្នុងជម្លោះនេះដែរឬទេ? នៅពេលដែលអំពើហឹង្សាកាន់តែខ្លាំង ភូមិសាស្ត្រជិតខាងនៃប្រទេសស៊ីរីទៅប្រទេសលីបង់ ធ្វើឲ្យវាស្ទើរតែចៀសមិនរួច ដែលព្រឹត្តិការណ៍នៅក្រោយនេះ នឹងប៉ះពាល់ដល់ប្រទេសទាំងពីរ។ តាមប្រវត្តិសាស្ត្រ លីបង់និងស៊ីរី ទំនងជាមានជោគវាសនាជាប់ទាក់ទងគ្នាទាំងនយោបាយ សេដ្ឋកិច្ច និងសង្គម ដោយសារទំនាក់ទំនងព្រំដែន និងវប្បធម៌រួមគ្នា។ បញ្ហានេះ ធ្វើឲ្យមានការព្រួយបារម្ភថា ជម្លោះនាពេលបច្ចុប្បន្ននៅក្នុងប្រទេសលីបង់ អាចរីករាលដាលឆ្លងព្រំដែន ជាពិសេស ដោយសារសម្ព័ន្ធភាពនិងគូប្រជែងសំខានៗនៅក្នុងតំបន់ដែលពាក់ព័ន្ធនឹងមិនត្រឹមតែតួអង្គក្នុងស្រុកប៉ុណ្ណោះទេ ប៉ុន្តែក៏មានមហាអំណាចពិភពលោក ដូចជាអ៊ីរ៉ង់ សហរដ្ឋអាមេរិក និងរុស្ស៊ីផងដែរ។

ជម្លោះនៅស៊ីរី និងលីបង់ បានផ្ទុះឡើងជាញឹកញាប់ពីមួយទៅមួយ ជាពិសេសក្នុងពេលមានជម្លោះស៊ីវិល។ ជាឧទាហរណ៍ សង្រ្គាមស៊ីវិលស៊ីរី មានឥទ្ធិពលបំផ្លិចបំផ្លាញលើប្រទេសលីបង់ ដែលបណ្តាលឲ្យមានភាពតានតឹងផ្នែកសេដ្ឋកិច្ចយ៉ាងធ្ងន់ធ្ងរ និងធ្វើឲ្យទំនាក់ទំនងក្នុងសង្គមមានការផ្លាស់ប្តូរ។

ក្នុងរយៈពេលមួយទសវត្សរ៍កន្លងទៅនេះ ប្រទេសលីបង់ បានទទួលជនភៀសខ្លួនស៊ីរីជិត១,៥ លាននាក់ ដោយដាក់ភាពតានតឹងយ៉ាងខ្លាំងលើហេដ្ឋារចនាសម្ព័ន្ធ និងសេវាសាធារណៈរបស់ខ្លួន។ ឥឡូវនេះ នៅពេលដែលអំពើហឹង្សា បានផ្ទុះឡើងនៅក្នុងប្រទេសលីបង់ ការលំបាក អាចកើតឡើង ដោយជនភៀសខ្លួនសម្រុកចូលទៅក្នុងប្រទេសស៊ីរី ធ្វើឲ្យប្រទេសដែលផុយស្រួយរួចទៅហើយនេះ មានអស្ថិរភាព។ ផលប៉ះពាល់ផ្នែកសង្គម សេដ្ឋកិច្ច និងនយោបាយនៃបញ្ហានេះ គឺធំធេង ហើយស៊ីរីទំនងជាមិនអាចគេចផុតពីការដួលរលំបានទេ ប្រសិនបើជម្លោះនេះ កាន់តែអាក្រក់ឡើងៗនោះ។