ក្រុមហេសបូឡានៃប្រទេសលីបង់ បានប្រកាសពីដំណាក់កាលថ្មីមួយ ក្នុងការប្រឈមមុខដាក់គ្នាជាមួយអ៊ីស្រាអែល។ នេះបើយោងតាមសេចក្តីថ្លែងការណ៍របស់ចលនានេះ នៅលើបណ្តាញ Telegram របស់ខ្លួន។

សេចក្តីថ្លែងការណ៍ បាននិយាយថា ដោយអនុវត្តតាមបញ្ជារបស់បញ្ជាការតស៊ូ ក្រុមនេះ បានចូលដំណាក់កាលថ្មី និងដំណាក់នៃការប្រឈមមុខដាក់គ្នាកាន់តែខ្លាំងឡើងជាមួយសត្រូវអ៊ីស្រាអែល ដែលនឹងកាន់តែ ច្បាស់ នៅក្នុងប៉ុន្មានថ្ងៃខាងមុខនេះ។

មុននេះ ចលនានេះ បាននិយាយនៅក្នុងសេចក្តីថ្លែងការណ៍របស់ខ្លួនថា យុទ្ធជនរបស់ខ្លួន បានសម្លាប់ទាហាន និងមន្ត្រីអ៊ីស្រាអែលយ៉ាងហោចណាស់ ៥៥នាក់ និងរបួសជាង ៥០០នាក់ទៀត ក្នុងការប្រយុទ្ធគ្នានៅក្នុងប្រទេសលីបង់ ចាប់តាំងពីដើមខែតុលា ដោយបានបំផ្លាញរថក្រោះ Merkava ចំនួន ២០គ្រឿង រថពាសដែកជាច្រើនគ្រឿង និងរថពាសដែកដឹកជញ្ជូនមួយចំនួនទៀត និងបានបាញ់ទម្លាក់យានដ្រូន Hermez 450 ចំនួនពីរគ្រឿង។ សេចក្តីថ្លែងការណ៍ ក៏បាននិយាយផងដែរថា៖«យុទ្ធជនតស៊ូជាច្រើនរយនាក់បានត្រៀមខ្លួនរួចជាស្រេច ដើម្បីទប់ទល់នឹងការឈ្លានពានទ្រង់ទ្រាយធំដោយកងកម្លាំងសត្រូវ»។

កាលពីថ្ងៃទី ២៣ ខែកញ្ញា អ៊ីស្រាអែល បានបើកប្រតិបត្តិការ Northern Arrows ប្រឆាំងនឹងអង្គភាព របស់ក្រុមហេសបូឡា ក្នុងប្រទេសលីបង់ ក្នុងអំឡុងពេលដែលខ្លួនកំពុងធ្វើការវាយប្រហារតាមអាកាសដ៏ធំប្រឆាំងនឹងទីតាំងយោធារបស់ចលនានេះ។ គោលបំណងដែលបានប្រកាស គឺដើម្បីបង្កើតលក្ខខណ្ឌសុវត្ថិភាពនៅក្នុងតំបន់ព្រំដែនភាគខាងជើងរបស់អ៊ីស្រាអែល ដូច្នេះអ្នកស្រុករាប់ម៉ឺននាក់ អាចត្រឡប់ទៅទីនោះវិញ។