ប្រធានាធិបតីបារាំង កាលពីថ្ងៃព្រហស្បតិ៍ (ទី១៧ ខែតុលា) បានចោទប្រកាន់រដ្ឋមន្ត្រីមួយចំនួនរបស់លោកថា ខ្វះជំនាញវិជ្ជាជីវៈ និងផ្សព្វផ្សាយព័ត៌មានមិនពិត ខណៈរិះគន់ប្រព័ន្ធផ្សព្វផ្សាយអំពីរបៀបរាយការណ៍របស់ពួកគេពីការអត្ថាធិប្បាយ ដែលតាមការអះអាង លោកបានធ្វើឡើងពាក់ព័ន្ធនឹងអ៊ីស្រាអែល អំឡុងកិច្ចប្រជុំគណៈរដ្ឋមន្ត្រី។

នៅក្នុងសញ្ញាចុងក្រោយបង្អស់នៃការខកចិត្តផ្នែកនយោបាយរបស់លោក ដោយបង្ហាញនូវកំហឹងយ៉ាងជាក់ស្ដែង លោក Emmanuel Macron បានស្តីបន្ទោសអ្នកសារព័ត៌មាន ជុំវិញការអត្ថាធិប្បាយដែលពួកគេបានរាយការណ៍ថា លោកបានស្នើឲ្យចោទសួរ អំពីការបង្កើតអ៊ីស្រាអែល នៅក្នុងកិច្ចប្រជុំគណៈរដ្ឋមន្ត្រី កាលពីថ្ងៃទី១៥ ខែតុលា ហើយបានបដិសេធថា លោកមិនបានធ្វើការកត់សម្គាល់បែបនោះឡើយ។

ក្នុងសន្និសីទសារព័ត៌មាន បន្ទាប់ពីកិច្ចប្រជុំក្រុមប្រឹក្សាអឺរ៉ុប នៅទីក្រុងប្រ៊ុចសែល ប្រទេសបែលហ្ស៊ិក លោក Macron បានលើកឡើងថា៖ «ខ្ញុំត្រូវតែប្រាប់អ្នកថា ខ្ញុំមានការភ្ញាក់ផ្អើលយ៉ាងខ្លាំង ពេលដឹងពីការបញ្ចេញមតិយោយល់ និងប្រតិកម្មជាច្រើន ក្នុងនោះរួមទាំងពីមេដឹកនាំនយោបាយបរទេស ឬបារាំង ចំពោះការកត់សម្គាល់ដែលតាមការអះអាង ខ្ញុំបានធ្វើឡើង ដោយមិនមានការសង្ស័យ អំពីអ្វីដែលពួកគេកំពុងនិយាយ និងអ្វីដែលខ្ញុំនិយាយនោះ ដោយជាក់ស្ដែង»។

លោកបានបន្ថែមថា៖ «ហេតុដូច្នេះ មិនមានភាពមិនច្បាស់លាស់នោះទេ។ អ្នកដែលចង់បង្កើតការបញ្ចេញមតិយោបល់ឡើង ដោយការរៀបចំបែបនេះ មិនត្រឹមតែជាកំហុសឆ្គងប៉ុណ្ណោះទេ ប៉ុន្តែថែមទាំងកំពុងធ្វើឲ្យមនុស្សមួយចំនួនឈឺចាប់ និងធ្វើឲ្យប្រទេសបារាំងអន់ថយទៀតផង។ បារាំងតែងតែឈរខាងអ៊ីស្រាអែលជានិច្ច។ អត្ថិភាព និងសន្តិសុខរបស់អ៊ីស្រាអែល គឺជាអ្វីដែលមិនអាចកាត់ថ្លៃបាន ទាំងសម្រាប់ប្រទេសបារាំង និងប្រជាជនបារាំង»៕