បាល់ទាត់៖ ក្រុមបាល់ទាត់ជម្រើសជាតិកម្ពុជានឹងត្រូវជួបកោះហ្គាំនាវេលាម៉ោង ១១យប់ថ្ងៃទី១២ ខែតុលានេះក្នុងជំនួបជើងទី២ នៃវគ្គជម្រុះពានរង្វាន់ AFC Asian Cup China 2023 Qualifiers នៅកីឡដ្ឋាន Khalifa Sport City ប្រទេសបារ៉ែន។ ជំនួបកាត់សេចក្ដីវគ្គ Play-Off នេះ កម្ពុជាត្រូវការត្រឹមស្មើប៉ុណ្ណោះដើម្បីទទួលបានកៅអីវគ្គចែកពូលជុំទី៣ នៃពានរង្វាន់ជើងឯកទ្វីបអាស៊ីនេះ បន្ទាប់ពីក្រុមគោព្រៃកម្ពុជាបានយកឈ្នះក្រុមដែនកោះរបស់សហរដ្ឋអាមេរិកដោយលទ្ធផល ១-០ ក្នុងជើងទី១ កាលពីចុងសប្ដាហ៍កន្លងទៅ។
ប៉ុន្តែដោយសារការបង្ហាញទម្រង់លេងមិនទាន់បានល្អប្រសើរកាលពីជើងទី១ លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានផ្ដោតការយកចិត្តទុកដាក់ខ្លាំងសម្រាប់ការប្រកួតជើងទី២ យប់នេះ ដោយសង្ឃឹមថា កូនក្រុមរបស់ខ្លួននឹងធ្វើបានល្អជាងមុន ដើម្បីប្រជែងកៅអីវគ្គបន្ដជាមួយកោះហ្គាំ។ គួរដឹងថា ប្រសិនបើកម្ពុជាឆ្លងផុតវគ្គជម្រុះនេះ កម្ពុជានឹងបានឡើងទៅបង្គ្រប់កៅអី ២៤ក្រុមនៃជុំទី៣ ដើម្បីបន្ដការប្រកួតជម្រុះ និងដណ្ដើមកៅអីជុំចុងក្រោយនៃពានរង្វាន់ជើងឯកទ្វីបអាស៊ីឆ្នាំ២០២៣ នៅប្រទេសចិន។ ការប្រកួតជុំទី៣ នឹងត្រូវបែងចែកជាំ ៦ពូលក្នុងមួយពូលមាន ៤ក្រុមដែលគ្រោងធ្វើការប្រកួតសន្សំពិន្ទុចាប់ពីថ្ងៃទី១ ខែកុម្ភៈរហូតដល់ថ្ងៃទី២៧ ខែកញ្ញា ឆ្នាំ២០២២។
សម្រាប់ក្រុមដែលមានសិទ្ធឡើងជុំផ្ដាច់ព្រ័ត្រនៃព្រឹត្តិការណ៍ ៤ឆ្នាំម្ដងនេះគឺក្រុមឈរលេខ១ នៃពូលទាំង ៦ និងក្រុមលេខ២ ល្អជាងគេចំនួន ៥ក្រុម។ រីឯការប្រកួតជុំចុងក្រោយនៅប្រទេសចិនគ្រោងធ្វើឡើងពីថ្ងៃទី១៦ ខែមិថុនារហូតដល់ថ្ងៃទី១៦ ខែកក្កដា ឆ្នាំ២០២៣ ខាងមុខដោយមានបេក្ខភាព ១៣ក្រុមកំពុងឈររួមមានម្ចាស់ផ្ទះចិន, ស៊ីរី, អូស្ដ្រាលី, អ៊ីរ៉ង់, អារ៉ាប៊ីសាអ៊ូឌីត, កាតា, ជប៉ុន, អារ៉ាប់រួម, កូរ៉េខាងត្បូង, អ៊ីរ៉ាក់, អូម៉ង់, វៀតណាម និងលីបង់៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
