នាយករដ្ឋមន្ត្រីចាំផ្ទះលីបង់ លោក Najib Mikati នៅថ្ងៃសុក្រ (ទី១៨ ខែតុលា) នេះ បាននិយាយថា លោកបានច្រានចោលការជ្រៀតជ្រែករបស់អ៊ីរ៉ង់ ក្នុងបញ្ហារបស់លីបង់ បន្ទាប់ពីប្រធានសភាអ៊ីរ៉ង់ បានប្រាប់ថា ទីក្រុងតេអេរ៉ង់បានត្រៀមខ្លួនរួចជាស្រេច ក្នុងការចរចាជាមួយប្រទេសបារាំង ស្ដីពីការអនុវត្តសេចក្ដីសម្រេចរបស់អង្គការសហប្រជាជាតិ (UN) ទាក់ទងនឹងភាគខាងត្បូងលីបង់។

គួរបញ្ជាក់ថា សេចក្ដីសម្រេច 1701 របស់ UN ដែលត្រូវបានអនុម័តក្នុងឆ្នាំ២០០៦ អំពាវនាវឲ្យតំបន់ព្រំដែនភាគខាងត្បូងរបស់លីបង់ ជាតំបន់គ្មានអាវុធ ឬកងទ័ព លើកលែងតែជាកងកម្លាំងរបស់រដ្ឋលីបង់ ដោយមានគោលបំណងរក្សាសន្តិភាព នៅតាមព្រំដែនជាមួយអ៊ីស្រាអែល។

ប្រធានសភាអ៊ីរ៉ង់លោក Mohammad Baqer Ghalibaf បានធ្វើអត្ថាធិប្បាយរបស់លោក នៅក្នុងបទសម្ភាសន៍មួយដែលត្រូវបានចេញផ្សាយ កាលពីថ្ងៃព្រហស្បតិ៍ (ទី១៧ ខែតុលា)។

សេចក្តីថ្លែងការណ៍របស់រដ្ឋាភិបាលបានដកស្រង់សម្តីលោក Mikati ដែលបាននិយាយថា៖ "«យើងមានការភ្ញាក់ផ្អើល ចំពោះគោលជំហរនេះ ដែលបង្កើតជាការជ្រៀតជ្រែក ក្នុងកិច្ចការលីបង់ និងការប៉ុនប៉ងបង្កើតអាណាព្យាបាលលើប្រទេសលីបង់ តែត្រូវបានច្រានចោល»។

លោក Mikati បានបន្ថែមថា ការចរចាដើម្បីអនុវត្តសេចក្ដីសម្រេច 1701 របស់ UN គឺជាបញ្ហារបស់រដ្ឋលីបង់៕