ប្រធានាធិបតីរុស្ស៊ី លោក Vladimir Putin នៅថ្ងៃសុក្រ (ទី១៨ ខែតុលា) បាននិយាយថា ក្រុមប្រទេស BRICS នឹងបង្កើតបាននូវកំណើនសេដ្ឋកិច្ចពិភពលោកភាគច្រើន នៅក្នុងប៉ុន្មានឆ្នាំខាងមុខនេះ ដោយសារទំហំរបស់ប្លុក និងកំណើនដ៏លឿន ធៀបនឹងប្រទេសអភិវឌ្ឍន៍លោកខាងលិច។

លោក Putin នឹងធ្វើជាម្ចាស់ផ្ទះនៃកិច្ចប្រជុំកំពូលរបស់ក្រុមនេះ នៅទីក្រុង Kazan នាថ្ងៃទី ២២-២៤ ខែតុលា។ លោកសង្ឃឹមថា នឹងសាងក្រុមប្រទេស BRICS ឲ្យក្លាយជាសម្ព័ន្ធដ៏មានឥទ្ធិពល ដើម្បីទប់ទល់នឹងលោកខាងលិច ទាំងផ្នែកនយោបាយ និងពាណិជ្ជកម្មរបស់ពិភពលោក បន្ទាប់ពីប្លុកនេះបានពង្រីកបន្ថែមសមាជិក ដោយរួមបញ្ជូលប្រទេសអេហ្ស៊ីប អេត្យូពី អ៊ីរ៉ង់ និងអារ៉ាប់រួម បន្ថែមពីលើសមាជិកដែលមានស្រាប់ គឺប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង។

យ៉ាងណាក្ដី កិច្ចប្រជុំកំពូលរបស់ក្រុមប្រទេស BRICS នាសប្តាហ៍ក្រោយនេះ ត្រូវបានទីក្រុងមូស្គូបង្ហាញជាភស្តុតាងថា កិច្ចខិតខំប្រឹងប្រែងរបស់លោកខាងលិច ដើម្បីធ្វើឲ្យរុស្ស៊ីក្លាយជាប្រទេសឯកោ ជុំវិញសកម្មភាពរបស់ខ្លួន នៅអ៊ុយក្រែននោះ បានបរាជ័យហើយ។

ហើយជាមួយគ្នានេះ ប្រទេសរុស្ស៊ីចង់ឲ្យប្រទេសផ្សេងទៀតធ្វើការជាមួយខ្លួន ដើម្បីកែប្រែប្រព័ន្ធហិរញ្ញវត្ថុពិភពលោក និងបញ្ចប់ការត្រួតត្រារបស់ប្រាក់ដុល្លារអាមេរិក៕