ប្រដាល់សកល៖ ការប្រកួតដណ្ដើមប្រាក់លានលើសង្វៀន Ultimate Boxing Championship 2021 (UBC) ដែលរៀបចំដោយសហព័ន្ធកីឡាប្រដាល់សកលកម្ពុជាបានចាប់ផ្ដើមហើយ ខណៈលទ្ធផលគូបើកឆាកកីឡាករ ទូច ដេវីត បានយកឈ្នះកីឡាករ សេត សារឹទ្ធ ដោយពិន្ទុកាលពីចុងសប្ដាហ៍កន្លងទៅ។
ក្នុងនាមគូដណ្ដើមប្រាក់លានប្រភេទទម្ងន់ ៦៣,៥គីឡូក្រាម និងជាសមាជិកក្រុមជម្រើសជាតិប្រដាល់សកលកម្ពុជាដូចគ្នា ដេវីត និង សារឹត បានធ្វើការប្ដូរកណ្ដាប់ដៃគ្នា ៣ទឹកពេញទើបដឹងចាញ់-ឈ្នះ ដោយគណៈកម្មការបានសម្រេចឲ្យកីឡាករ ទូច ដេវីត ឈ្នះកីឡាករ សែត សារឹត ដោយពិន្ទុ។ ក្រោយចប់ការប្រកួត សារឹត បានលើកឡើងថា ដោយសារខ្លួនប្រហែសរឿងទម្ងន់មុនពេលប្រកួតបណ្ដោយឲ្យឡើងទម្ងន់ ហើយត្រូវសម្រក់ភ្លាមៗធ្វើឲ្យរូបគេប្រកួតឆាប់ធ្លាក់ចុះកម្លាំង។ តែបើនិយាយពីសមត្ថភាព សារឹត មិនលើសខ្វះជាមួយ ទូច ដេវីត នោះទេ។ ដូច្នេះគេប្ដេជ្ញានឹងធ្វើឲ្យបានល្អសម្រាប់ការប្រកួតបន្ទាប់។ អមជាមួយគូដណ្ដើមប្រាក់លាននេះដែរ ក៏មានគូឯកដ៏ជក់ចិត្ត រវាងសិស្សច្បង ផល សុភ័ណ្ឌ និងអ្នកលេងកណ្ដាប់ដៃវ័យក្មេង វី សុភ័ស ផងដែរដោយអ្នកទាំងពីរបានធ្វើឲ្យកក្រើកសង្វៀន UBC ជាមួយការប្ដូរកណ្ដាប់ដៃ ៣ទឹកពេញដូចគ្នាទម្រាំសិស្សប្អូន វី សុភ័ស អាចយកឈ្នះ ផល សុភ័ណ្ឌ ដោយពិន្ទុ។
វី សុភ័ស បានសម្ដែងការសប្បាយចិត្តដែលខ្លួនអាចយកឈ្នះសិស្សច្បង ហើយក៏ជាការសងសឹកបានសម្រេចផងដែរ បន្ទាប់ពីរូបគេធ្លាប់ប្រកួតចាញ់ ផល សុភ័ណ្ឌ ក្នុងវគ្គផ្ដាច់ព្រ័ត្រជើងឯកថ្នាក់ជាតិកាលពីដើមឆ្នាំ២០២១ កន្លងទៅ។ សុភ័ស បានប្ដេជ្ញាខំប្រឹងបន្ថែមទៀតដើម្បីត្រៀមការប្រកួតនាពេលខាងមុខ ដ្បិតរូបគេក៏ជាបេក្ខភាពគូដណ្ដើមប្រាក់លាន និងជាសមាជិកក្រុមជម្រើសជាតិប្រដាល់សកលផងដែរ។ ចំណែកលទ្ធផលការប្រកួតសប្ដាហ៍ទី៣ ចំនួន ៤គូផ្សេងទៀតគឺមានគូពិសេសប្រចាំសប្ដាហ៍កីឡាករ ថា រីវ៉ា ប្រកួតឈ្នះ ឈុន ប្រាក់កាក់ ដោយពិន្ទុ និងកីឡាករ រឿម វណ្ណៈ ចាញ់ពិន្ទុកីឡាករ ស៊ឹម ពិសិដ្ឋ។ រីឯកីឡាករ ណន សុខលីម បានប្រកួតឈ្នះកីឡាករ សូផាត មេសា ដោយពិន្ទុ និងកីឡាករ លី ហ៊ាង យកឈ្នះកីឡាករ ឌឿន ចំរុង ដោយពិន្ទុដូចគ្នា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
