ក្រុមមន្ត្រីបាននិយាយថា អាជ្ញាធរបានបិទសាលារៀន មហាវិទ្យាល័យ និងសាកលវិទ្យាល័យ នៅក្នុងខេត្ត Punjab ភាគខាងកើតប្រទេសប៉ាគីស្ថាន នៅថ្ងៃសុក្រ (ទី១៨ ខែតុលា) នេះ បន្ទាប់ពីមានការតវ៉ារបស់និស្សិតយ៉ាងហិង្សាបំផុត នៅក្នុងប្រទេស រយៈពេលប៉ុន្មានឆ្នាំចុងក្រោយនេះ ពាក់ព័ន្ធទៅនឹងការចោទប្រកាន់ថា មានករណីចាប់រំលោភលើនិស្សិត នៅក្នុងបរិវេណសាលា។

ការតវ៉ាបានរីករាលដាលតាំងពីថ្ងៃចន្ទ ដោយអ្នកចូលរួមចោទប្រកាន់ថា និស្សិតស្រីម្នាក់ត្រូវបានសន្តិសុខម្នាក់ចាប់រំលោភ នៅក្នុងបរិវេណសាខាសាលាឯកជនមួយ ក្នុងទីក្រុង Lahore។

និស្សិតដែលតវ៉ារាប់រយនាក់ បានទាមទារឲ្យរដ្ឋាភិបាលចាត់វិធានការ ប៉ុន្តែមន្ត្រីនិយាយថា ពួកគេមិនទាន់រកឃើញភស្តុតាងណាមួយ ដែលបង្ហាញថា មានហេតុការណ៍បែបនេះទេ ដោយអ្នកខ្លះបានបន្ទោសបណ្ដាញសង្គមថា ផ្សព្វផ្សាយព័ត៌មានមិនពិត។

នគរបាលបាននិយាយថា និស្សិត នគរបាល និងបុគ្គលិកមហាវិទ្យាល័យរាប់សិបនាក់ បានរងរបួសចាប់តាំងពីថ្ងៃចន្ទមក នៅពេលដែលក្រុមអ្នកតវ៉ា បានប៉ះទង្គិចគ្នា អំឡុងពេលអនុវត្តច្បាប់ ខណៈដែលពួកគេបាននាំគ្នាសម្រុកចូលបរិវេណសាលា ដោយបានបន្ថែមថា និស្សិតរាប់រយនាក់ ត្រូវបានចាប់ខ្លួន។

ហើយស្ថាប័នអប់រំទាំងអស់នឹងនៅតែបិទរហូតដល់ថ្ងៃសុក្រនេះ ដែលជាការបញ្ជាដែលចេញដោយរដ្ឋបាលរបស់ខេត្ត Punjab និងដែលត្រូវបានឃើញដោយសារព័ទ៌មាន Reuters។ តែយ៉ាងណាក្ដី គ្មានហេតុផលផ្លូវការណាមួយត្រូវបានបញ្ជាក់ឲ្យដឹងនោះទេ៕