ប្រមុខដឹកនាំក្រុមហាម៉ាស លោក Yahya Sinwar ជាមេគំនិតរៀបគម្រោងការវាយឆ្មក់ឆ្លងព្រំដែនរបស់ក្រុមនេះ ក្នុងឆ្នាំ២០២៣ ដែលពេលនោះបានក្លាយជាថ្ងៃមានអ្នកស្លាប់ច្រើនបំផុត ក្នុងប្រវត្តិសាស្ត្ររបស់អ៊ីស្រាអែល ត្រូវបានសម្លាប់នៅក្នុងការប្រយុទ្ធ។ នេះបើយោងតាមឲ្យដឹងពីលោក Khalil Al-Hayya ដែលជាអនុប្រធានរបស់ក្រុមហាម៉ាស នៅតំបន់ហ្កាហ្សា និងជាប្រធានអ្នកចរចារបស់ក្រុមនេះ នៅថ្ងៃសុក្រ (ទី១៨ ខែតុលា) នេះ។

ការស្លាប់របស់លោក Sinwar ដែលកើតមានឡើងបន្ទាប់ពីការធ្វើឃាតរបស់អ៊ីស្រាអែល លើមេដឹកនាំ និងមេបញ្ជាការជាច្រើនរូបក្រុមហាម៉ាសផ្សេងទៀតនោះ នឹងផ្តល់ផលប៉ះពាល់យ៉ាងធ្ងន់ធ្ងរដល់ក្រុមអ៊ិស្លាមនិយមមួយនេះ ដែលបានប្រឈមមុខនឹងការវាយប្រហារតាមអាកាសឥតឈប់ឈរ ចាប់តាំងពីខ្លួនបានវាយប្រហារអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ដោយបានសម្លាប់មនុស្ស ១.២០០នាក់ ដែលជាចំនួនសរុបផ្ដល់ឲ្យដោយអ៊ីស្រាអែល។

មិនតែប៉ុណ្ណោះ ក្រុមនេះក៏បាននាំខ្លួនមនុស្សប្រហែល ២៥០នាក់ទៀតទៅកាន់តំបន់ហ្កាហ្សា ដោយបង្កើតឲ្យមានជាវិបត្តិចំណាប់ថ្នូរ សម្រាប់រដ្ឋាភិបាលស្តាំនិយមជ្រុលរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ដែលបានប្តេជ្ញាកម្ចាត់ក្រុមហាម៉ាសឲ្យបាន។

លោក Sinwar នឹងត្រូវបានចងចាំថា ជាអ្នកអនុវត្តយ៉ាងឃោរឃៅ ក្នុងចំណោមប្រជាជនប៉ាឡេស្ទីនដែលបានសហការជាមួយអ៊ីស្រាអែល និងជាសត្រូវគ្មានប្រណីមេត្តារបស់ប្រទេសដែលបានឃុំខ្លួនរូបលោកអស់រយៈពេលជាច្រើនឆ្នាំ។ លោក Sinwar ត្រូវបានតែងតាំងជាប្រមុខដឹកនាំជាន់ខ្ពស់របស់ក្រុមនេះ កាលពីថ្ងៃទី៦ ខែសីហា ដោយបានស្នងតំណែងពីអតីតប្រធាននយោបាយ លោក Ismail Haniyeh ដែលត្រូវបានធ្វើឃាត នៅទីក្រុងតេអេរ៉ង់ កាលពីថ្ងៃទី៣១ ខែកក្កដា៕