នៅរសៀលក្តៅហួតហែងនាខែមីនាឆ្នាំមុន កម្មករជំនួយអាមេរិកម្នាក់ បានអង្គុយនៅលើជើងម៉ា ស្ថិតក្នុងទីក្រុង Sheraro នៃតំបន់ទីក្រេប្រទេសអេត្យូពីដែលញាំញីដោយសារភ្លើងសង្រ្គាម ផឹកកាហ្វេ ពេលដែលរថយន្តធំពណ៌ក្រហមដឹកបាវគ្រាប់ធុញ្ញជាតិ ធ្វើដំណើរឆ្លងកាត់ ។

បាវគ្រាប់ធុញ្ញជាតិ មានបោះត្រា USAID ដែលជាពាក្យកាត់សម្រាប់ទីភ្នាក់ងារអភិវឌ្ឍន៍អន្តរជាតិសហរដ្ឋអាមេរិក និងជាអ្នកបរិច្ចាគជំនួយស្បៀងអាហារធំបំផុតរបស់ពិភពលោក ។

គ្រាប់ធុញ្ញជាតិទាំងនេះ ត្រូវបានផ្តល់ជូនដើម្បីជួយមនុស្សរាប់លាននាក់នៅតំបន់ទីក្រេ ដែលពឹងផ្អែកលើការបរិច្ចាគស្បៀងអាហារដើម្បីរស់រាន ។

ប៉ុន្តែផ្ទុយទៅវិញ រថយន្តធំពណ៌ក្រហមដែលត្រូវធ្វើដំណើរទៅកាន់គោលដៅដែលជាជំរំមានមនុស្សស្រេកឃ្លាននោះ បែរជាធ្វើដំណើរខុសទិសដៅទៅវិញ ។ កម្មករជំនួយ USAID ចូលរួមដោយសហការីជាច្រើននាក់ទៀត បានសម្រេចចិត្តដេញតាម ។

ក្រុមមន្រ្តី USAID និយាយថា ក្រោយមកទើបពួកគេដឹងថា គ្រាប់ធុញ្ញជាតិរាប់ពាន់តោនទាំងនេះ ត្រូវបានបង្វែរទិសដៅទៅកាន់រោងម៉ាស៊ីនកិនស្រូវពាណិជ្ជកម្ម និងទីផ្សារនៅទូទាំងប្រទេសអេត្យូពី ។

ការរកឃើញដោយចៃដន្យនេះ បានធ្វើឲ្យទីភ្នាក់ងារ USAID មានការភ្ញាក់ផ្អើលយ៉ាងខ្លាំង ដោយពួកគេបានប្រកាសឲ្យដឹងពីគម្រោងចោទប្រកាន់នេះ នៅខែឧសភា ឆ្នាំ ២០២៣ ហើយនិងបានបើកការស៊ើបអង្កេតចំពោះករណីមួយនេះ ។

កម្មវិធីស្បៀងអាហារពិភពលោកអង្គការសហប្រជាជាតិ(UN) ដែលជាអ្នកដៃគូសំខាន់របស់ USAID និងជាអ្នកចែកចាយជំនួយស្បៀងអាហារធំ ក្នុងការចិញ្ចឹមពលរដ្ឋអត់ឃ្លាននៅប្រទេសអេត្យូពី និងនៅលើសកលលោក និយាយផងដែរថា ពួកគេនឹងបើកការស៊ើបអង្កេតលើករណីចោទប្រកាន់មួយនេះ ។

ទីភ្នាក់ងារជំនួយយក្សមួយនេះ បានផ្អាកការចែកចាយជំនួយស្បៀងអាហារនៅទូទាំងប្រទេសអេត្យូពី ស្របពេលដែលពួកគេពិនិត្យបញ្ហាខាងលើ ជាហេតុធ្វើឲ្យអាក់ខានការផ្គត់ផ្គង់ជំនួយដល់មនុស្សអត់ឃ្លានរាប់លាននាក់អស់រយៈពេល ៥ខែ ។

ទោះបីជាយ៉ាងណាក៏ដោយ មកទល់នឹងពេលនេះ ពួកគេនៅមិនទាន់ចេញការរកឃើញរបស់ពួកគេ ឬកំណត់ឈ្មោះជនសង្ស័យនោះឡើយ ។

ស្របពេលដែលចំនួនបាត់បង់សរុបនៃគ្រាប់ធុញ្ញជាតិពុំត្រូវបានដឹងនោះ មន្រ្តីមួយរូបនៅតំបន់ទីក្រេ និយាយថា ស្រូវសាលីជាង ៧ពាន់តោនដែលត្រូវបានលួចយកទៅ ល្មមគ្រប់គ្រាន់អាចចិញ្ចឹមមនុស្ស ៤៥ម៉ឺននាក់ ក្នុង ១ខែ ៕