អូឡាំពិក៖ គណៈកម្មាធិការជាតិអូឡាំពិកកម្ពុជា (NOCC) បានបន្តរៀបចំវគ្គសិក្សាសាមគ្គីអូឡាំពិកស្តីពីរដ្ឋបាលកីឡាជាលើកទី៣ ប្រចាំឆ្នាំ២០២១ នៅខេត្តកែបចាប់ពីថ្ងៃទី១១ ដល់ថ្ងៃទី១៤ ខែតុលា ឆ្នាំ២០២១ ដែលធ្វើឡើងតាមប្រព័ន្ធ Zoom។ លោក ឯម ហៀង ប្រធានគណៈគ្រប់គ្រងវគ្គបានឲ្យដឹងថា គ្រូឧទ្ទេសប្រចាំវគ្គនេះគឺមាន ៣រូបដដែលរួមមានលោកព្រឹទ្ធបុរសវេជ្ជបណ្ឌិត សុខ សារឿន ប្រធានគណៈកម្មការវេជ្ជសាស្ត្រកីឡា អមគណៈកម្មាធិការជាតិអូឡាំពិកកម្ពុជា លោក បឹង គឹមតោ ប្រធាននាយកដ្ឋានអប់រំកាយ និងកីឡា សិស្ស-និស្សិតនៃក្រសួងអប់រំ យុវជន និងកីឡា និងឯកឧត្តម វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការ NOCC។
លោកបន្ដថា វគ្គរដ្ឋបាលកីឡានេះផ្តោតសំខាន់ខ្លឹមសារវេជ្ជសាស្ត្រកីឡា ការធ្វើការជាមួយអ្នកស្ម័គ្រចិត្ត រៀបចំព្រឹត្តិការណ៍ រៀបចំអង្គប្រជុំ ទំនាក់ទំនង ស្ត្រី និងកីឡា ប្រវត្តិចលនាអូឡាំពិក និងរចនាសម្ព័ន្ធ អង្គការសាមគ្គីអូឡាំពិក ការលេងដោយយុត្តិធម៌ ភាពជាអ្នកដឹកនាំ ផែនការកម្មវិធីហ្វឹកហាត់កីឡា និងផែនការធ្វើដំណើររបស់គណៈប្រតិភូ ពិសេសគឺការបញ្ជ្រាបនូវយុទ្ធនាការឆ្ពោះទៅស៊ីហ្គេមឆ្នាំ២០២៣ នៅកម្ពុជាផងដែរ។ ឯកឧត្តម វ៉ាត់ ចំរើន ធ្លាប់បានបង្ហាញសុទិដ្ឋិនិយមថា តាមរយៈការចែករំលែកចំណេះដឹងពីគ្រូឧទ្ទេសក្នុងវគ្គនេះ នឹងធ្វើឲ្យសិក្ខាកាមដែលជាគ្រូកីឡា មន្ត្រីកីឡាទាំងអស់នឹងទទួលបាននូវអត្ថប្រយោជន៍ជាច្រើន ដើម្បីជួយជំរុញឲ្យវិស័យកីឡាតាមបណ្ដាខេត្តឲ្យកាន់តែរីកចម្រើនបន្ថែមទៀត ជាពិសេសគឺគោលដៅរួមគ្នាអភិវឌ្ឍឆ្ពោះទៅទទួលធ្វើម្ចាស់ផ្ទះការប្រកួតស៊ីហ្គេម-អាស៊ានប៉ារ៉ាហ្គេម នាឆ្នាំ២០២៣។
គួរដឹងថា នេះគឺជាលើកទី៣ ហើយដែល NOCC បានរៀបចំវគ្គសាមគ្គីអូឡាំពិកស្ដីពីរដ្ឋបាលកីឡានេះឡើងក្នុងឆ្នាំ២០២១ ដោយទទួលបានការឧបត្ថម្ភគាំទ្រពីអង្គការសាមគ្គីអូឡាំពិក និងមានកិច្ចសហការពីក្រសួងអប់រំ យុវជន និងកីឡា។ ចំពោះការរៀបចំ ២លើកកន្លងមកបានធ្វើនៅភ្នំពេញ និងខេត្តតាកែវ ខណៈខេត្តចុងក្រោយដែល NOCC គ្រោងរៀបចំវគ្គនេះគឺនឹងធ្វើឡើងនៅខេត្តរតនគិរី។ នេះបើតាមការបញ្ជាក់របស់លោក ឯម ហៀង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
