មនុស្សជាង៣០នាក់ បានមកប្រមូលផ្តុំគ្នា កាលពីថ្ងៃសុក្រ ដើម្បីតវ៉ានៅខាងក្រៅស្ថានកុងស៊ុលឥណ្ឌានៅទីក្រុង Toronto ប្រទេសកាណាដា។ លោក Kuljeet Singh អ្នកនាំពាក្យរបស់ក្រុមអ្នកកាន់សាសនាស៊ីកដើម្បីយុត្តិធម៌ បានអំពាវនាវឱ្យប្រទេសកាណាដា បិទស្ថានកុងស៊ុលឥណ្ឌា នៅក្នុងប្រទេសនេះ។ លោក Singh បាននិយាយថា យើងជឿថា ឥណ្ឌានៅតែជាការគំរាមកំហែងដល់អធិបតេយ្យភាពរបស់ប្រទេសកាណាដា និងសេរីភាពនៃការបញ្ចេញមតិរបស់ប្រទេសកាណាដា។

សាសនាស៊ីក នៅក្នុងប្រទេសកាណាដា បានស្ថិតក្នុងចំណាប់អារម្មណ៍ចាប់តាំងពីនាយករដ្ឋមន្ត្រី លោក Justin Trudeau កាលពីឆ្នាំមុន បានចោទប្រកាន់រដ្ឋាភិបាលឥណ្ឌាថា មានជាប់ពាក់ព័ន្ធកាលពីថ្ងៃទី១៨ ខែមិថុនាឆ្នាំ២០២៣ ក្នុងករណីឃាតកម្មលើ លោក Hardeep Singh Nijjar មេដឹកនាំផ្តាច់ខ្លួនសាសនាស៊ីកនៅក្នុងប្រទេសកាណាដា និងមិត្តភ័ក្ររបស់ លោក Moninder Singh ដែលត្រូវបានសម្លាប់នៅក្នុងតំបន់ Surrey ។

រដ្ឋាភិបាលឥណ្ឌា បានបដិសេធការជាប់ពាក់ព័ន្ធទៅនឹងការសម្លាប់លោក Nijjar ហើយប្រទេសឥណ្ឌា បានចោទប្រកាន់ប្រទេសកាណាដា ថា បានផ្តល់ទីសុវត្ថិភាពសម្រាប់ក្រុមផ្តាច់ខ្លួនសាសនាស៊ីក។

ប្រទេសកាណាដា បាននិយាយកាលពីថ្ងៃចន្ទដើមសប្តាហ៍នេះថា ខ្លួនបានបណ្តេញអ្នកការទូតឥណ្ឌាចំនួនប្រាំមួយរូប ដោយភ្ជាប់ការជាប់ពាក់ព័ន្ធរបស់ពួកគេទៅនឹងការសម្លាប់លោក Nijjar និងចោទប្រកាន់កិច្ចខិតខំដើម្បីកំណត់គោលដៅអ្នកប្រឆាំងឥណ្ឌា នៅក្នុងប្រទេសកាណាដា តាមរយៈការសម្លាប់ ការជំរិតទារប្រាក់ ការប្រើប្រាស់ឧក្រិដ្ឋកម្មរៀបចំទុក និងការប្រមូលព័ត៌មានសម្ងាត់។

ជាមួយគ្នានេះ ឥណ្ឌាបានសងសឹកវិញដោយបញ្ជាឱ្យបណ្ដេញចេញអ្នកការទូតកាណាដា៦នាក់ ដូចគ្នា ហើយបានចាត់ទុកការចោទប្រកាន់នេះថាជារឿងមិនត្រឹមត្រូវ និងមានហេតុផលនយោបាយ។