សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានថ្លែងថា នាពេលបច្ចុប្បន្ននេះ ប្រទេសកម្ពុជានៅសល់ផ្ទៃដីមានគ្រាប់មីន ប្រមាណជាង ១៧០០គីឡូម៉ែត្រការ៉េទៀត កំពុងធ្វើការបោសសំអាត ខណៈកាកសំណល់ដែលបន្សល់ទុកពីសង្គ្រាមនេះ តែងតែបង្កគ្រោះថ្នាក់ដល់មនុស្ស សត្វពាហនៈជារៀងរាល់ឆ្នាំ ជាមួយនឹងការបំផ្លាញនូវសម្ភារជាច្រើនទៀត ។

នៅក្នុងកម្មពិធីសំណេះសំណាល និងបំពាក់កន្សែងយុវជនកាកបាទក្រហមកម្ពុជា មកពីគ្រឹះស្ថានឧត្តមសិក្សា២៥ ក្នុងរាជធានីភ្នំពេញ សម្ដេចធិបតីនាយករដ្ឋមន្ត្រី មានប្រសាសន៍ថា សង្គ្រាមមិនត្រឹមសម្លាប់មនុស្ស នៅក្នុងពេលប្រយុទ្ធគ្នានោះទេ ដោយសង្គ្រាមបន្តសម្លាប់ប្រជាពលរដ្ឋខ្មែរ តាមរយៈការបន្សល់ទុកនូវគ្រាប់មីន ។

សម្ដេចធិបតី បានបន្តថា ក្នុងរយៈពេលជិត ៣០ឆ្នាំ កងកម្លាំងនានា បានបោសសំអាតផ្ទៃដីមានមីន ប្រមាណជាង ៣ពាន់គីឡូម៉ែត្រការ៉េ ហើយនៅសល់ប្រមាណជាង ១ពាន់ ៧រយគីឡូម៉ែត្រការ៉េទៀត ខណៈប្រជាពលរដ្ឋរស់នៅក្នុងតំបន់មានមីននោះ ប្រមាណជាង ១លាននាក់ ។

គួរបញ្ជាក់ កម្ពុជាបានដាក់គោលដៅ នៅឆ្នាំ២០២៥ ក្នុងការបោសសំអាតគ្រាប់មីនឲ្យអស់ ខណៈកងកម្លាំងជាច្រើនមានដូចជា ស៊ីម៉ាក់ កងទ័ពមួកខៀវ អង្គការមេក និងអង្គការហែឡូត្រាស់ជាដើម កំពុងខិតខំធ្វើការបោសសំអាតនៅទូទាំងប្រទេស ៕ អត្ថបទ បាន សុខរិទ្ធិ