អ្នកនាំពាក្យក្រសួងការបរទេសចិន អ្នកស្រី Mao Ning បាននិយាយនៅក្នុងសន្និសីទសារព័ត៌មានមួយថា ប្រទេសចិន មិនផ្គត់ផ្គង់អាវុធដល់រុស្ស៊ី ឬអ៊ុយក្រែនទេ ហើយគ្រប់គ្រងយ៉ាងតឹងរ៉ឹងលើការនាំចេញទំនិញប្រើប្រាស់សម្រាប់ស៊ីវិលនិងយោធា។

អ្នកស្រី Mao Ning បាននិយាយថា៖«ប្រទេសចិនប្រឆាំងយ៉ាងម៉ឺងម៉ាត់ចំពោះការដាក់ទណ្ឌកម្មឯកតោភាគីខុសច្បាប់របស់សហរដ្ឋអាមេរិកប្រឆាំងនឹងសហគ្រាសចិន ហើយនឹងមិនទទួលយកការចោទប្រកាន់ដោយគ្មានមូលដ្ឋាន ឬផ្តល់លទ្ធផលទៅនឹងសម្ពាធរបស់សហរដ្ឋអាមេរិកឡើយ«។ អ្នកស្រី បានបន្ថែមថា៖« ប្រទេសចិន មិនដែលផ្តល់អាវុធដែលឲ្យបង្កគ្រោះថ្នាក់ ដល់ភាគីណាមួយ នៅក្នុងជម្លោះរុស្ស៊ី-អ៊ុយ   ក្រែននោះទេ។ យើងគ្រប់គ្រងយ៉ាងតឹងរ៉ឹងនូវការនាំចេញទំនិញប្រើប្រាស់សម្រាប់ស៊ីវិលនិងយោធា រួមទាំងយានដ្រូន និងប្រឆាំងនឹងការប្រើប្រាស់យានដ្រូនស៊ីវិលសម្រាប់គោលបំណងយោធា»។

អ្នកស្រី បានបញ្ជាក់ថា ប្រទេសចិន នឹងចាត់វិធានការចាំបាច់ទាំងអស់ ដើម្បីការពារសិទ្ធិ និងផលប្រយោជន៍ស្របច្បាប់របស់ធុរកិច្ច និងពលរដ្ឋចិន។ លោកស្រី បន្តថា ចិនមិនបានចាប់ផ្តើមជម្លោះអ៊ុយក្រែនទេ ហើយក៏មិនមែនជាភាគីនៃជម្លោះនេះទេ។ លោកស្រី បានបន្ថែមថា ក្រុងប៉េកាំង បានតស៊ូមតិយ៉ាងខ្ជាប់ខ្ជួនសម្រាប់សន្តិភាព និងការចរចា ដោយដើរតួនាទីស្ថាបនាក្នុងការសម្របសម្រួលដំណោះស្រាយ   នយោបាយ។

មុននេះ សហរដ្ឋអាមេរិក បានបន្ថែមបុគ្គលមួយរូប និងអង្គភាពចំនួនបី ទៅក្នុងបញ្ជីទណ្ឌកម្មរបស់ខ្លួន ដែលទីក្រុងវ៉ាស៊ីនតោន អះអាងថា មានការជាប់ពាក់ព័ន្ធនឹងការអភិវឌ្ឍយានដ្រូន Garpiya ដែលប្រើក្នុងប្រតិបត្តិការយោធាពិសេសនៅអ៊ុយក្រែន។ អ្នកនាំពាក្យក្រសួងការបរទេសអាមេរិក លោក Matthew Miller បានបញ្ជាក់ថា ការអភិវឌ្ឍនិងការផលិតយានដ្រូន Garpiya ត្រូវបានចោទប្រកាន់ថា ធ្វើឡើងនៅក្នុងប្រទេសចិន ដោយមានការសម្របសម្រួលជាមួយក្រុមហ៊ុនការពារជាតិរុស្ស៊ី។