ក្រុមហ៊ួទីនៅប្រទេសយេម៉ែន បានប្រកាសនៅក្នុងសេចក្តីថ្លែងការណ៍មួយកាលពីថ្ងៃសុក្រថា ពួកគេ បានប្រើយានដ្រូនផ្ទុកគ្រាប់បែក ដើម្បីវាយប្រហារនាវា នៅសមុទ្រអារ៉ាប់។

សេចក្តីថ្លែងការណ៍មួយដែលចេញផ្សាយដោយទូរទស្សន៍ al-Masirah TV បានដកស្រង់សម្តីអ្នកនាំពាក្យយោធារបស់ក្រុមនេះ លោក Yahya Sarea ដែលបាននិយាយថា៖ «ដើម្បីគាំទ្រដល់ការតស៊ូរបស់ប៉ាឡេស្ទីន និងលីបង់ កងកម្លាំងរបស់យើង បានធ្វើប្រតិបត្តិការមួយ ដែលបានកំណត់គោលដៅលើនាវា Megalopolis នៅសមុទ្រអារ៉ាប់ ជាមួយនឹងយានដ្រូនជាច្រើនគ្រឿង ហើយប្រតិបត្តិការនេះ បានសម្រេចគោលដៅដោយជោគជ័យ»។ 

លោកបាននិយាយថា នាវានេះ ត្រូវបានកំណត់គោលដៅ ដោយសារតែក្រុមហ៊ុនដែលជាម្ចាស់របស់វា មាន «ទំនាក់ទំនង» ជាមួយអ៊ីស្រាអែល។

អ្នកនាំពាក្យ បានបន្តថា៖«យើងបញ្ជាក់ពីការបន្តរបស់យើងក្នុងការកំណត់គោលដៅលើនាវាទាំងអស់ ដែលមានការពាក់ព័ន្ធ  ឬធ្វើដំណើរទៅកាន់ ឬមានទំនាក់ទំនងជាមួយអ៊ីស្រាអែល ហើយយើងនឹងបន្តកំណត់គោលដៅអ៊ីស្រាអែលដោយមីស៊ីល និយានដ្រូន» ដោយបានប្តេជ្ញាថា ក្រុមរបស់លោក នឹងមិនបញ្ឈប់ការវាយប្រហាររហូតដល់ «ការឈ្លានពានប្រឆាំងនឹងតំបន់ហ្កាហ្សា» ហើយលីបង់ ត្រូវបាន   បញ្ឈប់ »។

ក្រុមហ៊ួទី មិនបានបញ្ជាក់ពីពេលវេលានៃការវាយប្រហារនោះទេ។