សេវាសារព័ត៌មានរបស់រដ្ឋាភិបាលអាល្លឺម៉ង់ បាននិយាយថា មេដឹកនាំនៃប្រទេសអាល្លឺម៉ង់ សហរដ្ឋអាមេរិក បារាំង និងចក្រភពអង់គ្លេស បានជួបប្រជុំគ្នា នៅទីក្រុងប៊ែរឡាំង ដើម្បីពិភាក្សាអំពីជំនួយបន្ថែម ដល់ទីក្រុងគីវ និងផែនការដោះស្រាយជម្លោះរបស់ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី។

សេវាសារព័ត៌មាន បានឲ្យដឹងថា អធិការបតីអាល្លឺម៉ង់ លោក Olaf Scholz ប្រធានាធិបតីអាមេរិក Joe Biden នាយករដ្ឋមន្ត្រីអង់គ្លេស Keir Starmer និងប្រធានាធិបតីបារាំង Emmanuel Macron «បានពិភាក្សាអំពីផែនការសម្រាប់ផ្តល់ជំនួយដល់អ៊ុយក្រែនបន្ថែមលើផ្នែកសន្តិសុខ ជំនួយសេដ្ឋកិច្ច និងជំនួយមនុស្សធម៌» រួមទាំងពីទ្រព្យសម្បត្តិរបស់រុស្ស៊ីដែលបានបង្កក។ 

យោងតាមសេវាសារព័ត៌មានរបស់រដ្ឋាភិបាលអាល្លឺម៉ង់ មេដឹកនាំទាំងអស់ ក៏បានពិភាក្សាអំពី «ផែនការជ័យជម្នះ» របស់ប្រធានាធិបតីអ៊ុយក្រែន និងបានបញ្ជាក់ឡើងវិញនូវការប្តេជ្ញាចិត្តរបស់ពួកគេ ក្នុងការជួយអ៊ុយក្រែន ក្នុងកិច្ចខិតខំប្រឹងប្រែងរបស់ខ្លួន ឆ្ពោះទៅរកសន្តិភាពដ៏ត្រឹមត្រូវ និងយូរអង្វែង ដោយផ្អែកលើច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ និងការគោរពអធិបតេយ្យភាព និងបូរណភាពទឹកដីរបស់អ៊ុយក្រែន។