យ៉ាងហោចណាស់មនុស្ស ៧នាក់បានស្លាប់ បន្ទាប់ពីផ្នែកនៃផែចំណតសម្រាប់សាឡាងមួយបានបាក់រលំ ដោយធ្វើឱ្យមនុស្សយ៉ាងតិច ២០នាក់ ធ្លាក់ចូលទៅក្នុងដែនទឹកអាត្លង់ទិកនៅឆ្នេរសមុទ្រនៃរដ្ឋ ចចា (Georgia) របស់សហរដ្ឋអាមេរិក។ នាវាឆ្មាំល្បាតឆ្នេរអាមេរិក កំពុងបន្តស្វែងរកអ្នកដែលបាត់ខ្លួននៅយប់ថ្ងៃសៅរ៍ (១៩ តុលា)។

អាជ្ញាធរបាននិយាយថា ឧបទ្ទវហេតុដែលបណ្តាលឱ្យមានអ្នករងរបួសជាច្រើននេះ បានកើតឡើងក្នុងអំឡុងពេលប្រារព្ធពិធីមួយរបស់សហគមន៍ ហ្គូឡា-ហ្គីឈី (Gullah-Geechee) ដ៏តូចនៃកោះ សាប៉េឡូ (Sapelo)។

លោក ថាយឡឺ ចូនស៍ (Tyler Jones) អ្នកនាំពាក្យនៃក្រសួងធនធានធម្មជាតិរបស់រដ្ឋ បាននិយាយថា ផ្លូវផែចំណតពោរពេញដោយមួយហ្វូងដែលកំពុងរង់ចាំជិះសាឡាងមួយនោះ បានបាក់រលំកាលពីរសៀលថ្ងៃសៅរ៍ នៅលើកោះរបស់រដ្ឋ ចចា មួយនេះ ដែលមានចម្ងាយប្រហែល ១០០គីឡូម៉ែត្រ ភាគខាងត្បូងនៃទីក្រុង សាវ៉ានណា (Savannah)។ 

អនុប្រធានាធិបតី លោកស្រី Kamala Harris ដែលកំពុងស្ថិតនៅទីក្រុង អាត្លង់តា (Atlanta) របស់រដ្ឋនេះសម្រាប់ព្រឹត្តិការណ៍យុទ្ធនាការ បានចេញសេចក្តីថ្លែងការណ៍មួយកាលពីល្ងាចថ្ងៃសៅរ៍ដោយនិយាយថា រដ្ឋបាលលោកប្រធានាធិបតី Joe Biden កំពុងទាក់ទងយ៉ាងជិតស្និទ្ធជាមួយមន្ត្រីរដ្ឋ និងមូលដ្ឋាន ហើយបានផ្តល់ការគាំទ្រសហព័ន្ធណាមួយដែលត្រូវការ៕