​​អ៊ីរ៉ាក់៖ យោង​តាម​លទ្ធផល​បឋម​ក្រុម​មន្ត្រី និង​អ្នកនាំពាក្យ​របស់​ចលនា Sadrist បាន​និយាយ​ថា ​គណបក្ស​របស់​លោក Moqtada al-Sadr មេដឹកនាំ​សាសនា​អ៊ីស្លាម​និកាយ​ស៊ី​អ៊ី​ត​គឺជា​អ្នកឈ្នះ​ ដែល​ទទួល​បាន​សំឡេង​ភាគច្រើន​ធំ​បំផុត​នៅ​ក្នុង​ការ​បោះ​ឆ្នោត​នៅ​អ៊ីរ៉ាក់​កាលពី​ថ្ងៃ​ចន្ទ ដោយ​បង្កើន​ចំនួន​អាសនៈ​ដែល​លោក​មាននៅ​ក្នុង​សភា​។​

​លទ្ធផល​បឋម​បាន​បង្ហាញ​ថា អតីត​នាយករដ្ឋមន្ត្រី​លោក Nouri al-Maliki អាច​ឈ្នះ​សំឡេង​ភាគ​ច្រើន​បន្ទាប់​ក្នុងចំណោម​គណបក្ស​អ៊ីស្លាម​និកាយ​ស៊ី​អ៊ី​ត​។ ក្រុម​និកាយ​ស៊ី​អ៊ី​ត​របស់​អ៊ីរ៉ាក់​បាន​គ្រប​ដណ្ដប់​លើ​រដ្ឋាភិបាល​ និង​ការ​បង្កើត​រដ្ឋាភិបាល​ចាប់​តាំង​ពី​ការ​លុកលុយ​ដឹកនាំ​ដោយ​សហរដ្ឋ​អាមេរិក​ក្នុង​ឆ្នាំ​២០០៣ ដែល​បាន​ផ្តួល​រំលំ​របប​ផ្តាច់​ការ​អ៊ីស្លាម​និកាយ​ស៊ុន​នី​របស់​លោក Saddam Hussein និង​បាន​ធ្វើ​ឱ្យ​ប្រជាជន​អ៊ីស្លាម​នី​កាយ​ស៊ី​អ៊ី​ត​ភាគច្រើន និង​ជនជាតិ​ឃឺ​ដ​កាន់​អំណាច​។

​ការ​រាប់​ផ្អែកលើ​លទ្ធផល​បឋម​ពី​បណ្ដា​ខេត្ត​មួយ​ចំនួន​របស់​អ៊ីរ៉ាក់បូក​នឹង​រដ្ឋធានី​បា​ដា​ដ​ ដែល​ត្រូវ​បាន​ផ្ទៀងផ្ទាត់​ដោយ​ក្រុម​មន្ត្រី​រដ្ឋាភិបាល​ក្នុង​តំបន់​បាន​អះ​អាង​ថា លោក Sadr បាន​ឈ្នះ​ជាង ៧០​អាសនៈ​ ប្រសិនបើ​មានការ​បញ្ជាក់​នោះ​អាច​ផ្ដល់​អំណាច​គ្រប់គ្រាន់​ឲ្យ​លោក​ក្នុង​ការ​បង្កើត​រដ្ឋាភិបាល​ថ្មី​បាន​។​ មន្ត្រី​ម្នា​ក់​នៅ​គណៈកម្មការ​រៀបចំ​ការ​បោះឆ្នោត​របស់​ប្រទេស​អ៊ីរ៉ាក់​បាន​និយាយ​ថា​ លោក Sadr បាន​ឈរ​លំដាប់​លេខ​រៀង​ទី​១ ប៉ុន្តែ​មិនបាន​បញ្ជាក់​ភ្លាមៗ​ថា ​តើ​គណបក្ស​របស់​លោក​ទ​ទួល​បាន​ប៉ុន្មាន​អាសនៈ​នោះ​ទេ​៕

អត្ថបទ៖ សុខមាន