យោងតាមទិន្នន័យពីក្រសួងកសិកម្មបានឱ្យដឹងថា ទឹកជំនន់នៅក្នុងប្រទេសបង់ក្លាដែស បានបំផ្លាញដំណាំស្រូវប្រមាណ ១,១លានតោន ដែលជំរុញឱ្យប្រទេសនេះបង្កើនការនាំចូលគ្រាប់ធញ្ញជាតិ ស្របពេលតម្លៃស្បៀងអាហារកើនឡើងខ្លាំង។

ទឹកជំនន់ដែលនាំមកដោយភ្លៀងមូសុងដ៏ខ្លាំងក្លា និងទឹកហៀរហូរទន្លេបានវាយប្រហារប្រទេសនេះជារលកធំៗចំនួនពីរក្នុងខែសីហា និងតុលា ដោយបានឆក់យកជីវិតមនុស្សរាប់សិបនាក់ និងប៉ះពាល់ដល់មនុស្សរាប់លាននាក់ ជាពិសេសនៅតំបន់ភាគខាងកើត និងភាគខាងជើង ដែលការខូចខាតដំណាំមានកម្រិតធ្ងន់ធ្ងរបំផុត។

ក្រសួងកសិកម្មបានឲ្យដឹងថា ទឹកជំនន់នៅឆ្នាំនេះបានធ្វើឲ្យបាត់បង់ផលិតកម្មស្រូវយ៉ាងច្រើន។ ទឹកជំនន់ក៏បានប៉ះពាល់យ៉ាងធ្ងន់ធ្ងរដល់កសិផលផ្សេងទៀត រួមទាំងបន្លែជាង ២០ម៉ឺនតោនផងដែរ។ ការខាតបង់កសិកម្មសរុបទូទាំងប្រទេសដោយសារទឹកជំនន់ត្រូវបានប៉ាន់ប្រមាណថាមានប្រហែល ៤៥ពាន់លានតាកា (៣៨០លានដុល្លារ)។

បង់ក្លាដែស ដែលជាប្រទេសផលិតស្រូវធំជាងគេទីបីរបស់ពិភពលោក ជាធម្មតាផលិតស្រូវជិត ៤០លានតោនក្នុងមួយឆ្នាំ ដើម្បីចិញ្ចឹមប្រជាជនចំនួន ១៧០លាននាក់របស់ខ្លួន។ ទោះជាយ៉ាងណាក៏ដោយ គ្រោះមហន្តរាយធម្មជាតិតែងតែរំខានដល់ផលិតកម្ម និងនាំទៅរកកំណើននៃការពឹងផ្អែកលើការនាំចូលពីខាងក្រៅ៕