លោក ប្រាបូវូ ស៊ូប៊ៀនតូ (Prabowo Subianto) បានជំរុញឱ្យប្រជាជនឥណ្ឌូនេស៊ីក្លាហាន ដើម្បីយកឈ្នះលើ ឧបសគ្គ បញ្ហាប្រឈម និងការគំរាមកំហែងទាំងឡាយរបស់ប្រទេសនេះ ប៉ុន្តែបានអំពាវនាវឱ្យប្រជាជនប្រកាន់សុជីវធម៌ នៅពេលពួកគេដោះស្រាយការខ្វែងគំនិតគ្នារបស់ខ្លួន បន្ទាប់ពីលោកបានស្បថចូលកាន់តំណែងជាប្រធានាធិបតីទី៨របស់ប្រទេសសេដ្ឋកិច្ចធំបំផុតរបស់អាស៊ីអាគ្នេយ៍កាលពីថ្ងៃអាទិត្យ។

ប្រធានាធិបតីនៃប្រទេសប្រជាធិបតេយ្យធំជាងគេទីបីរបស់ពិភពលោកមួយនេះបានប្តេជ្ញាប្រយុទ្ធប្រឆាំងរាល់បញ្ហាផ្ទៃក្នុងដូចជាអំពើពុករលួយដែលញាំញីប្រទេសនេះ និងធ្វើឱ្យប្រទេសនេះរីកចម្រើនកាន់តែខ្លាំង។

នៅក្នុងសុន្ទរកថាដ៏រំជួលចិត្តរយៈពេល ៥០ នាទីទៅកាន់មនុស្សជាង ១.០០០នាក់ នៅឯសភារបស់ប្រទេសឥណ្ឌូនេស៊ីបន្ទាប់ពីបានស្បថចូលកាន់តំណែងជាមួយអនុប្រធានាធិបតីវ័យក្មេងលោក ជីប្រាន រ៉ាសាប៊ូមីង រ៉ាកា (Gibran Rakabuming Raka) អតីតឧត្តមសេនីយ៍វ័យ ៧៣ ឆ្នាំរូបនេះក៏បានសន្យាថានឹងធ្វើការដើម្បីផលប្រយោជន៍របស់ប្រទេសជាតិទាំងមូល ក្នុងចំណោមប្រជាជន ២៧៤ លាននាក់ មិនមែនតែអ្នកដែលបានបោះឆ្នោតឱ្យរូបលោកនោះទេ។

លោក ប្រធានាធិបតី ប្រាបូវូ ស៊ូប៊ៀនតូ បានស្វែងរកការជួយជ្រោមជ្រែងរបស់ប្រជាជនឥណ្ឌូនេស៊ី ដើម្បីបំពេញភារកិច្ច និងកម្មវិធីរដ្ឋាភិបាលក្នុងអំឡុងពេល ១០០ ថ្ងៃដំបូងនៃអាណត្តិរបស់លោក។

លោក ប្រាបូវូ បាននិយាយថា ប្រទេសនេះត្រូវតែបន្តគោលនយោបាយដាក់ចេញដោយលោក Widodo ដែលសំដៅលើដំណើរការផលិត ផលិតផលដែលមានតម្លៃបន្ថែមក្នុងស្រុកបានមកពីរ៉ែ ជំនួសឱ្យការនាំចេញសារធាតុរ៉ែឆៅទៅបរទេស ដែលនឹងទទួលបានផលចំណេញផ្នែកសេដ្ឋកិច្ចច្រើនជាងគេបំផុតនៅអាស៊ីអាគ្នេយ៍៕