ស្ថានទូតអ៊ីស្រាអែលប្រចាំនៅប្រទេសអាល្លឺម៉ង់ បានអរគុណដល់នគរបាលនៅក្នុងសេចក្តីថ្លែងការណ៍មួយលើបណ្តាញX. បន្ទាប់ពីមានការវាយប្រហារមិនជោគជ័យទៅលើស្ថានទូត ក្នុងទីក្រុងប៊ែរឡាំង។

ការិយាល័យរដ្ឋអាជ្ញាសហព័ន្ធសាធារណៈ បាននិយាយថា ជនជាតិលីប៊ី ឈ្មោះ Omar A. ត្រូវបានចាប់ខ្លួន នៅក្នុងទីក្រុង Bernau ក្បែរទីក្រុងប៊ែរឡាំង។

ពួកគេ និយាយថា បុរសនោះគឺជាអ្នកគាំទ្រមនោគមវិជ្ជានៃអង្គការភេរវកម្មបរទេស «រដ្ឋអ៊ីស្លាម (IS)» ហើយមានផែនការវាយប្រហារដោយអាវុធ លើស្ថានទូតអ៊ីស្រាអែលក្នុងទីក្រុងប៊ែរឡាំង ប្រទេសអាល្លឺម៉ង ចាប់តាំងពីចូលដល់ខែតុលា ឆ្នាំ២០២៤ មក ។

ក្រសួងមហាផ្ទៃរបស់ប្រទេសអាល្លឺម៉ង់ បានបញ្ជាក់លើការការពារស្ថាប័នជនជាតិជ្វីហ្វ និងអ៊ីស្រាអែល បន្ទាប់ពីការឃុំខ្លួនជនសង្ស័យ ដោយនិយាយនៅក្នុងសេចក្តីថ្លែងការណ៍ថា ក្រសួងកំពុងមានចំណាត់ការដោយប្រុងប្រយ័ត្ន និងយកចិត្តទុកដាក់បំផុតចំពោះហេតុការណ៍បែបនេះក្នុងកម្រិតខ្ពស់ ចំពោះការគំរាមកំហែងបង្កឡើងដោយក្រុមឥស្លាមនិយម។