​

មន្ត្រីក្រសួងយុត្តិធម៌របស់ប្រទេសហ្វីលីពីន បាននិយាយនៅថ្ងៃចន្ទ ទី២១ ខែតុលានេះថា សមាជិក១៧នាក់នៃក្រុមសកម្មប្រយុទ្ធដែលមានទំនាក់ទំនងជាមួយក្រុមរដ្ឋអ៊ីស្លាម ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទចាប់ជំរិតជនបរទេស និងជនជាតិហ្វីលីពីន នៅក្នុងប្រទេសម៉ាឡេស៊ី រយៈពេលជិត២៥ឆ្នាំកន្លងទៅនេះ។

កាលពីខែមេសា ឆ្នាំ២០០០ សមាជិកនៃក្រុមជ្រុលនិយមអ៊ីស្លាម Abu Sayyaf បានចាប់ជំរិតមនុស្ស ២១នាក់ពីរមណីយដ្ឋានសម្រាកលំហែកាយមួយកន្លែងនៅលើកោះ Sipadan ប្រទេសម៉ាឡេស៊ី។

ចំណាប់ខ្មាំងទាំងនោះ បានស៊ូទ្រាំទៅនឹងការឃុំខ្លួនជាច្រើនខែនៅក្នុងព្រៃ កោះJolo ភាគខាងត្បូងទីក្រុងម៉ានីល រហូតដល់ពួកគេត្រូវបានលោះខ្លួនសម្រាប់ប្រាក់រាប់លានដុល្លារ។ ពួកគេរួមមានជនជាតិហ្វីលីពីន ហ្វាំងឡង់ បារាំង អាល្លឺម៉ង់ លីបង់ ម៉ាឡេស៊ី និងអាហ្វ្រិកខាងត្បូង។

មន្ត្រីក្រសួងយុត្តិធម៌ និយាយនៅក្នុងសេចក្តីថ្លែងការណ៍ថា ការកាត់ទោសនេះគឺជាការបង្ហាញពីកិច្ចខិតខំប្រឹងប្រែងឥតនឿយហត់របស់ក្រសួងយុត្តិធម៌ ក្នុងការប្រកាន់ខ្ជាប់នីតិរដ្ឋដោយគ្មានការភ័យខ្លាចឬស្ទាក់ស្ទើរ។

ជនជាប់ចោទទាំង១៧នាក់ ត្រូវបានរកឃើញថាមានទោស កាលពីថ្ងៃទី១៦ ខែតុលា ក្នុងចំណោម បទចោទប្រកាន់ចំនួន២១ករណីនៃការចាប់ជំរិត និងការឃុំខ្លួនមនុស្សដោយខុសច្បាប់ដើម្បីទាមទារប្រាក់លោះ។ 

សេចក្តីសម្រេចដែលមាន១៥៧ទំព័រ បាននិយាយថា អ្នកទាំងអស់នេះត្រូវបានកាត់ទោសឱ្យជាប់ពន្ធនាគារអស់មួយជីវិត។