ប្រេសិតពិសេសសហរដ្ឋអាមេរិកលោក Amos Hochstein និយាយនៅថ្ងៃចន្ទនេះនៅទីក្រុងបេរូតថា សហរដ្ឋអាមេរិកកំពុងធ្វើការជាមួយអ៊ីស្រាអែល និងលីបង់ ដើម្បីស្វែងរករូបមន្តដែលនាំឲ្យបញ្ចប់ជម្លោះរបស់ពួកគេឲ្យបានល្អ ។

 សេចក្តីសម្រេចលេខ ១៧០១របស់អង្គការសហប្រជាជាតិ(UN)ដែលបានបញ្ចប់ជុំចុងក្រោយនៃជម្លោះរវាងអ៊ីស្រាអែល និងក្រុមជីវពលហេសបូឡាកាលពីឆ្នាំ ២០០៦ បានកំណត់ឲ្យតំបន់ភាគខាងត្បូងលីបង់គ្មានទាហាន ឬអាវុធក្រៅពីរដ្ឋលីបង់ ។

 ទោះបីជាយ៉ាងណាក៏ដោយ ក្រុមចលនាស៊ីអ៊ីតគាំទ្រដោយអ៊ីរ៉ង់មួយនេះ ពុំបានបញ្ចប់វត្តមានរបស់ពួកគេឡើយ ។

 ភាពតានតឹងឆ្លងព្រំដែននៅតែបន្ត ផ្តើមឡើងពីការវាយប្រហារដោយមីស៊ីលរបស់ក្រុមហេសបូឡាលើតំបន់ភាគខាងជើងអ៊ីស្រាអែក ដើម្បីគាំទ្រក្រុមហាម៉ាស់ប៉ាឡេស្ទីននៅតំបន់ហ្កាហ្សា ក្រោយការសម្លាប់រង្គាលនៅតំបន់ភាគខាងត្បូងអ៊ីស្រាអែលកាលពីរយៈពេលជាង ១ឆ្នាំមុន ។

 លោក Hochstein ដែលបំពេញទស្សនកិច្ចទៅកាន់ប្រទេសលីបង់ជាលើកទី ២ក្នុងរយៈពេល ២ខែកន្លងមកនេះ មាននូវជំនួបជាមួយក្រុមមន្រ្តីលីបង់ នៅក្នុងដំណើរជំរុញការសម្របសម្រួលថ្មីរបស់សហរដ្ឋអាមេរិក ដើម្បីនាំសន្តិភាពមកកាន់តំបន់មជ្ឈិមបូព៌ា ក្រោយអ៊ីស្រាអែលសម្លាប់មេដឹកនាំក្រុមហាម៉ាស់លោក Yahya Sinwar កាលពីសប្តាហ៍មុន ។

 លោក Hochstein បាននិយាយប្រាប់សន្និសីទសារព័ត៌មានថា ភាគីទាំង ២ ប្តេជ្ញាចិត្តលើសេចក្តីសម្រេច UN លេខ ១៧០១ មិនទាន់គ្រប់គ្រាន់នោះទេ ។

 លោកបន្តថា ពួកយើងកំពុងធ្វើការជាមួយរដ្ឋាភិបាលលីបង់ រដ្ឋលីបង់ ក៏ដូចជារដ្ឋាភិបាលអ៊ីស្រាអែល ដើម្បីទទួលបានរូបមន្តដែលនាំឲ្យបញ្ចប់ជម្លោះមួយនេះតែម្តង និងសម្រាប់អ្នកទាំងអស់គ្នា ។

លោក Hochstein បញ្ជាក់ទៀតថា លោកមាននូវជំនួបលក្ខណៈស្ថាបនាជាមួយប្រធានសភាលោក Nabih Berri គឺជាសម្ព័ន្ធមិត្តជិតស្និតរបស់ក្រុមហេសបូឡា ដែលបានចូលរួមកិច្ចខិតខំផ្នែកការទូតដើម្បីបញ្ចប់ជម្លោះមួយនេះ ៕