កងទ័ពអ៊ីស្រាអែល បាននិយាយកាលពីថ្ងៃចន្ទ (២១ តុលា) ថា មេបញ្ជាការចុងក្រោយបង្អស់ដែលទទួលខុសត្រូវក្នុងការផ្តល់មូលនិធិផ្នែកហិរញ្ញវត្ថុដល់ក្រុមសកម្មប្រយុទ្ធ ហេសបូឡា របស់លីបង់ ត្រូវបាន “លុបបំបាត់” នៅក្នុងប្រទេសស៊ីរី។
អ្នកនាំពាក្យកងទ័ព លោក ដានីញែល ហាហ្ការី (Daniel Hagari) បាននិយាយនៅក្នុងសេចក្តីថ្លែងការណ៍មួយថា បុរស ដែលមិនត្រូវបានបញ្ចេញឈ្មោះនោះ បានដឹកនាំអង្គភាព៤៤០០ របស់ក្រុមដែលអ៊ីរ៉ង់គាំទ្រមួយនេះ ដោយទទួលខុសត្រូវលើការផ្ទេរ និងប្រមូលថវិកាទៅកាន់ក្រុមហេសបូឡា តាមរយៈការលក់ប្រេងរបស់ទីក្រុងតេអេរ៉ង់។
នៅព្រឹកថ្ងៃចន្ទ ក្រសួងការពារជាតិស៊ីរី បានប្រកាសពីការស្លាប់មនុស្សពីរនាក់ ក្នុងការវាយប្រហារដែលសន្មតថាជារបស់អ៊ីស្រាអែល ដោយការដាក់គោលដៅលើរថយន្តមួយគ្រឿងក្នុងទីក្រុងដាម៉ាស។ ក្រុមសង្កេតការណ៍សិទ្ធិមនុស្សស៊ីរីរាយការណ៍ថា ការវាយប្រហារមួយបានកំណត់គោលដៅលើបុរសមិនមែនជាជនជាតិស៊ីរីម្នាក់ ដែលកំពុងបើករថយន្តរបស់ខ្លួននៅក្នុងតំបន់មួយ ដែលជាទីកន្លែងប្រារព្ធធ្វើពិធីរំលឹកវិញ្ញាណក្ខន្ធដល់មេដឹកនាំក្រុមហាម៉ាស លោក យ៉ាយ៉ា ស៊ីនវ៉ា (Yahya Sinwar) ដែលត្រូវបានសម្លាប់ដោយអ៊ីស្រាអែល កាលពីសប្តាហ៍មុននៅតំបន់ហ្កាហ្សា។
សូមបញ្ជាក់ថា អង្គភាព៤៤០០ របស់ហេសបូឡា ទទួលខុសត្រូវដឹកជញ្ជូនប្រេងអ៊ីរ៉ង់ ទៅកាន់ស៊ីរី ហើយបន្ទាប់មកទៅលក់នៅលីបង់ ដែលអ៊ីស្រាអែល និយាយថាមានតម្លៃប្រហែលរាប់សិបលានដុល្លារអាមេរិក។ អ៊ីស្រាអែល បាននិងកំពុងវាយលុកជើងគោកអស់រយៈពេលជិតមួយខែដើម្បីបណ្ដេញក្រុមហេសបូឡា ចេញពីព្រំដែនភាគខាងជើងរបស់ខ្លួន ហើយក្នុងរយៈពេលប៉ុន្មានថ្ងៃថ្មីៗនេះ បានបង្កើនការវាយលុកលើហិរញ្ញវត្ថុរបស់ក្រុមសកម្មប្រយុទ្ធលីបង់មួយនេះ៕