ខណៈដែលការបោះឆ្នោតប្រធានាធិបតីអាមេរិក នៅសល់តែជាង ១០ថ្ងៃទៀតប៉ុណ្ណោះ ករណីអំពើហិង្សានយោបាយបានកើនឡើងខ្លាំង ដោយថ្មីៗនេះនៅទីក្រុង York រដ្ឋ Pennsylvania បុរសម្នាក់បានវាយអ្នកស្រុកដែលកំពុងចុះឈ្មោះក្នុងយុទ្ធនាការសេតវិមានរបស់អនុប្រធានាធិបតី លោកស្រី Kamala Harris។
នៅភាគខាងជើងនៃរដ្ឋ Michigan ជនដៃដល់ម្នាក់ដែលខឹងសម្បារនឹងលោក Donald Trump បានបើករថយន្តបំបុកហ្វូងមនុស្ស និងធ្វើឱ្យមនុស្សម្នាក់រងរបួស។
ការវាយប្រហារថ្មីៗទាំងនេះស្ថិតក្នុងចំណោមយ៉ាងហោចណាស់ ៣០០ករណី នៃហិង្សានយោបាយ ចាប់តាំងពីអ្នកគាំទ្ររបស់លោក Trump បានសម្រុកចូលវិមានកាពីតូល របស់សហរដ្ឋអាមេរិក កាលពីថ្ងៃទី០៦ ខែមករា ឆ្នាំ២០២១មក រួមទាំងឧប្បត្តិហេតុយ៉ាងហោចណាស់ ៥១ករណី ក្នុងឆ្នាំនេះ។ ដោយនៅប្រហែលពីរសប្តាហ៍ទៀតប៉ុណ្ណោះមុនការបោះឆ្នោតប្រធានាធិបតីថ្ងៃទី០៥ ខែវិច្ឆិកា ករណីទាំងនេះគឺជាផ្នែកមួយនៃការកើនឡើងដ៏ធំបំផុត និងជានិរន្តរភាពនៃអំពើហិង្សានយោបាយរបស់សហរដ្ឋអាមេរិក ចាប់តាំងពីទសវត្សរ៍ឆ្នាំ១៩៧០។
អំពើហិង្សាមួយចំនួនត្រូវបានរាយការណ៍យ៉ាងទូលំទូលាយ ជាពិសេសការប៉ុនប៉ងធ្វើឃាតលើលោក Trump ដែលជាបេក្ខភាពបក្សសាធារណរដ្ឋ។ ឧប្បត្តិហេតុធំៗផ្សេងទៀតរួមមានការបាញ់ប្រហារចំនួន ៣លើកក្នុងប៉ុន្មានសប្តាហ៍ថ្មីៗនេះនៅឯការិយាល័យយុទ្ធនាការបក្សប្រជាធិបតេយ្យសម្រាប់លោកស្រី Harris ក្នុងរដ្ឋ Arizona។
ល្បឿននៃករណីបែបនេះនៅតែកើនឡើងគួរឱ្យកត់សម្គាល់ចាប់តាំងពីឆ្នាំ២០១៦មក អំឡុងពេលវេលានៃការឈរឈ្មោះជាប្រធានាធិបតីលើកដំបូងរបស់លោក Trump។ ក្រុមអ្នកជំនាញខាងនយោបាយជ្រុលនិយមព្រមានថា បរិយាកាសដ៏តានតឹងជុំវិញការបោះឆ្នោតប្រធានាធិបតីឆ្នាំ២០២៤នេះ បានបង្កើតឱ្យមានស្ថានភាពប្រែប្រួលកាន់តែវឹកវរយ៉ាងខ្លាំង៕