បេក្ខជនប្រធានាធិបតីនៃគណបក្សប្រជាធិបតេយ្យ លោកស្រី Kamala Harris និងគូប្រជែងមកពីគណបក្សសាធារណរដ្ឋគឺលោក Donald Trump បានបង្កើនល្បឿនយុទ្ធនាការរបស់ខ្លួនកាលពីថ្ងៃចន្ទ (២១ តុលា) ដោយការបន្តវាយប្រហារគ្នាទៅមក ខណៈភាគីទាំងពីរព្យាយាមយកឈ្នះចិត្តអ្នកបោះឆ្នោត រយៈពេលពីរសប្តាហ៍ប៉ុណ្ណោះមុនថ្ងៃបោះឆ្នោត ០៥ វិច្ឆិកា។

លោកស្រី Harris ដែលធ្វើយុទ្ធនាការជាមួយអតីតសមាជិកសភាបក្សសាធារណរដ្ឋម្នាក់ បានព្យាយាមបញ្ចុះបញ្ចូលស្ត្រីនៅក្នុងរដ្ឋប្រទាញប្រទង់ភាគខាងលិចចំនួនបីថា អតីតប្រធានាធិបតី លោក Trump គឺជាការគំរាមកំហែងដល់សិទ្ធិរំលូតកូន សន្តិសុខជាតិ និងលទ្ធិប្រជាធិបតេយ្យ។

ខណៈការបោះឆ្នោតខិតកាន់តែជិត លោកស្រី Harris ដែលទើបមានវ័យ ៦០ឆ្នាំ បានផ្ដោតការវាយប្រហារលើកាយសម្បទារបស់លោក Trump ថាមិនស័ក្ដិសមនឹងតំណែង ដោយហៅលោកថា “រញីរញ័រ” និងរិះគន់ពីអាកប្បកិរិយាមិនសមរម្យ។ លោក Trump វ័យ ៧៨ឆ្នាំ ជារឿយៗច្រានចោលការយល់ឃើញណាមួយដែលថាលោកជាការគំរាមកំហែងដល់លទ្ធិប្រជាធិបតេយ្យ ដោយលើកហេតុផលថា ពួកប្រជាធិបតេយ្យទេដែលជាការគំរាមកំហែងពិតប្រាកដដោយសារតែការស៊ើបអង្កេតព្រហ្មទណ្ឌប្រឆាំងនឹងលោក។

ក្នុងពេលដែលលោកស្រី Harris រិះគន់ថាលោក Trump មិនស័ក្តិសមសម្រាប់តំណែងប្រធានាធិបតី លោក Trump កំពុងចោទសួរពីសមត្ថភាពរបស់រដ្ឋបាលលោក Joe Biden បច្ចុប្បន្ន។ ជាមួយនឹងការស្ទង់មតិបង្ហាញការប្រជែងយ៉ាងប្រកៀកប្រកិត បេក្ខជនទាំងពីរកំពុងបង្កើនល្បឿន និងកាលវិភាគយុទ្ធនាការ ដោយគូសបញ្ជាក់ពីសារៈសំខាន់នៃអ្នកបោះឆ្នោតក្នុងរដ្ឋប្រទាញប្រទង់ដែលអាចកំណត់អ្នកឈ្នះ៕