អតីតប្រធានាធិបតីសហរដ្ឋអាមេរិក និងជាបេក្ខជនប្រធានាធិបតីនៃគណបក្សសាធារណរដ្ឋសម្រាប់ឆ្នាំ២០២៤ លោក Donald Trump បានប្រមូលផ្តុំការជួបជុំមួយនៅទីលានសង្វៀន Williams Arena នៅឯអគារ Minges Coliseum កាលពីថ្ងៃចន្ទ ទី២១ ខែតុលា ដោយមានអ្នកចូលរួមគាំទ្រយ៉ាងច្រើន។ លោក Trump ដែលគេស្គាល់សម្រាប់វោហាសាស្ត្ររបស់លោក ដែលបានផ្តោតលើសុន្ទរកថា លើការបោះឆ្នោត នាពេលខាងមុខ មាន វិបត្តិព្រំដែន និងរដ្ឋបាលបច្ចុប្បន្ន។

លោក Trump និយាយថា ការបោះឆ្នោតនេះគឺជាជម្រើសមួយរវាងថាតើ យើងនឹងជ្រើរើសយកអ្នកអសមត្ថភាព និងឆោតល្ងង់ រយៈពេលបួនឆ្នាំទៀតដែរទេ ព្រមទាំងភាពបរាជ័យនិងមហន្តរាយ ឬថាតើយើងនឹងចាប់ផ្តើមឆ្នាំដ៏អស្ចារ្យបំផុតរយៈពេលបួនឆ្នាំ ក្នុងប្រវត្តិសាស្ត្រនៃប្រទេសរបស់យើង ឬយ៉ាងណា។

លោកបានបង្ហាញការព្រួយបារម្ភយ៉ាងខ្លាំងអំពីសន្តិសុខតាមព្រំដែន និងបានរិះគន់រដ្ឋបាលបច្ចុប្បន្នដែលអនុញ្ញាតឲ្យមានអន្តោប្រវេសន៍ ដែលពុំបានត្រួតពិនិត្យ។

លោក Trump ស្ថិតក្នុងការប្រកួតប្រជែងយ៉ាងប្រកៀកប្រកិតជាមួយអនុប្រធានាធិបតី គណបក្សប្រជាធិបតេយ្យ លោកស្រី Kamala Harris នៅមុនការបោះឆ្នោតថ្ងៃទី៥ ខែវិច្ឆិកា ខាងមុខ។ ការការបោះឆ្នោតស្ទង់មតិបង្ហាញថា អន្តោប្រវេសន៍ខុសច្បាប់គឺជាក្តីបារម្ភរបស់អ្នកបោះឆ្នោត ហើយលោក Trump ត្រូវបានមើលឃើញដោយអ្នកបោះឆ្នោតភាគច្រើនថា ជាអ្នកដែលអាចដោះស្រាយបញ្ហានេះបានល្អបំផុត។

ដោយចោទប្រកាន់រដ្ឋបាលបច្ចុប្បន្នថា អសមត្ថភាព លោក Trump បាននិយាយថា លោក Biden បានដាក់មនុស្សដែលពុំឆ្លាតវៃ ឱ្យទទួលខុសត្រូវលើបញ្ហាព្រំដែនរបស់យើង ជាអ្នកដែលបាននិយាយថា នៅរក្សាព្រំដែនទាំងនោះឱ្យនៅបើកចំហ ដោយអនុញ្ញាតឱ្យមនុស្សគ្រប់គ្នាចូលមក។

យោងតាមទិន្នន័យរបស់រដ្ឋាភិបាលបានឱ្យដឹងថា ជនអន្តោប្រវេសន៍ប្រហែល៧លាននាក់ ត្រូវបានចាប់ខ្លួនខណៈឆ្លងកាត់ព្រំដែនអាមេរិក-ម៉ិកស៊ិក ដោយខុសច្បាប់ក្នុងអំឡុងពេលរដ្ឋបាលរបស់លោក Biden ជាចំនួនកំណត់ត្រាខ្ពស់ដែលបានជំរុញឱ្យមានការរិះគន់លើលោកស្រី Harris និង លោក Biden ពីសំណាក់លោក Trump និងសមាជិកគណបក្សសាធារណរដ្ឋ។