ការវាយប្រហាររបស់អ៊ីស្រាអែល នៅជាយក្រុងភាគខាងត្បូងទីក្រុងបេរូតប្រទេសលីបង់ បានធ្វើឱ្យសាខានៃស្ថាប័នហិរញ្ញវត្ថុដែលមានទំនាក់ទំនងជាមួយក្រុមហេសបូឡា ត្រូវរងការបំផ្លាញ។

អ៊ីស្រាអែល បានពុំបានបង្ហាញសញ្ញាណាមួយនៃការបន្ថយការវាយលុករបស់ខ្លួននៅក្នុងប្រទេសលីបង់ និងតំបន់ហ្កាហ្សាឡើយ បន្ទាប់ពីបានសម្លាប់មេដឹកនាំក្រុមហេសបូឡា និងក្រុមហាម៉ាស ជាក្រុមសកម្មប្រយុទ្ធដែលត្រូវបានគាំទ្រដោយប្រទេសអ៊ីរ៉ង់។

អគ្គលេខាធិការសម្ព័ន្ធអារ៉ាប់ បានអំពាវនាវឱ្យមានបទឈប់បាញ់បន្ទាន់នៅក្នុងប្រទេសលីបង់ ហើយបេសកជនពិសេសរបស់សហរដ្ឋអាមេរិក លោក Amos Hochstein បាននិយាយថា ទីក្រុងវ៉ាស៊ីនតោន កំពុងធ្វើការលើរូបមន្តមួយ ដើម្បីបញ្ចប់ជម្លោះរវាងអ៊ីស្រាអែល និងក្រុមហេសបូឡា។

លោកបាននិយាយថា វាមិនគ្រប់គ្រាន់ទេសម្រាប់ភាគីទាំងពីរក្នុងការប្តេជ្ញាចិត្តចំពោះសេចក្តីសម្រេច លេខ១៧០១ របស់អង្គការសហប្រជាជាតិ ដែលបានបញ្ចប់ជម្លោះជុំចុងក្រោយនៅក្នុងឆ្នាំ២០០៦។ សេចក្រីសម្រេចរបស់អង្គការសហប្រជាជាតិ លេខ១៧០១ បានទទួលជោគជ័យក្នុងការបញ្ចប់សង្រ្គាមនៅឆ្នាំ២០០៦ ប៉ុន្តែកង្វះការអនុវត្តន៍ក្នុងរយៈពេលប៉ុន្មានឆ្នាំមកនេះ បានរួមចំណែកដល់ជម្លោះដែលកើតឡើងនាពេលបច្ចុប្បន្ននេះ។

រដ្ឋមន្ត្រីការបរទេសអាមេរិកលោក Antony Blinken បានធ្វើទស្សនកិច្ចនៅប្រទេសអ៊ីស្រាអែល  ជាទីឈប់ចតដំបូងនៃដំណើរទស្សនកិច្ចនៅតំបន់មជ្ឈិមបូព៌ាក្នុងគោលបំណងស្តារឡើងវិញនូវកិច្ចចរចាបទឈប់បាញ់នៅតំបន់ហ្កាហ្សា និងពិភាក្សាអំពីអនាគតនៃតំបន់ហ៊ុមព័ទ្ធមួយនេះ បន្ទាប់ពីការស្លាប់មេដឹកនាំក្រុមហាម៉ាសលោក Yahya Sinwar។ ក្នុងកិច្ចខិតខំប្រឹងប្រែង នេះជាដំណើរទស្សនកិច្ចរបស់លោកលើកទី១១ ចាប់តាំងពីការវាយប្រហារលើប្រទេសអ៊ីស្រាអែលដោយក្រុមហាម៉ាស ដែលបានបង្កឱ្យមានសង្រ្គាមនៅតំបន់ហ្កាហ្សា ។

អ៊ីស្រាអែល និយាយថា ខ្លួនចង់បណ្តេញក្រុមអ្នកប្រយុទ្ធហេសបូឡា ចេញពីតំបន់ព្រំដែន ដូច្នេះប្រជាជនអ៊ីស្រាអែលរាប់ម៉ឺននាក់ អាចត្រឡប់ទៅលំនៅឋានវិញបន្ទាប់ពីបានភៀសខ្លួន។ ពួកគេត្រូវបង្ខំចិត្តភៀសខ្លួនកាលពីឆ្នាំមុន ដោយសារការបាញ់ផ្លោងឆ្លងព្រំដែនពីក្រុមហេសបូឡា ដែលបានចាប់ផ្តើមក្នុងសាមគ្គីភាពជាមួយប៉ាឡេស្ទីន។

យោងតាមមន្ត្រីប៉ាឡេស្ទីនបានឲ្យដឹងថា យុទ្ធនាការរបស់អ៊ីស្រាអែល នៅតំបន់ហ្កាហ្សា បានសម្លាប់មនុស្សជាង៤២.៥០០នាក់ រហូតមកដល់ពេលនេះ។