របាយការណ៍ដែលថា ទាហានកូរ៉េខាងជើងរាប់ពាន់នាក់អាចនឹងចូលរួមជាមួយរុស្ស៊ីក្នុងពេលឆាប់ៗនេះ ដើម្បីប្រយុទ្ធនៅអ៊ុយក្រែន កំពុងធ្វើឱ្យមានការជជែកពិភាក្សាឡើងវិញអំពីការបញ្ជូនទាហានអឺរ៉ុបទៅកាន់ប្រទេសនេះ ដើម្បីជួយក្រុមអ្នកការពារទីក្រុង Kyiv ។ 

រដ្ឋមន្ត្រីការបរទេសលីទុយអានី លោកហ្គាប្រៀល លីស លែនស្បើហ្គីស (Gabrielius Landsbergis ) បានប្រាប់សារព័ត៌មាន POLITICO ថ្មីៗថា ដល់ពេលហើយសម្រាប់បណ្តាប្រទេសសហភាពអឺរ៉ុប ពិនិត្យមើលឡើងវិញនូវគំនិតរបស់លោកប្រធានាធិបតីបារាំង Emmanuel Macron ក្នុងការពង្រាយកងទ័ពទៅកាន់អ៊ុយក្រែន។ 

លោកប្រធានាធិបតីបារាំងបានលើកសំណើកាលពីខែកុម្ភៈក្នុងការឆ្លើយតបភ្លាមៗចំពោះអធិការបតីអាល្លឺម៉ង់លោក Olaf Scholz ដែលបានប្តេជ្ញាថានឹងមិនមានកងទ័ពអឺរ៉ុប ឬណាតូត្រូវដាក់ពង្រាយនៅអ៊ុយក្រែនទេ។

រដ្ឋមន្ត្រីការបរទេសលីទុយអានីរូបនេះ បានបន្ថែមថា គួរឱ្យសោកស្ដាយ យើងកំពុងយឺតយ៉ាវម្តងទៀតហើយ ទោះមានប្រតិកម្មក្ដី ប៉ុន្តែខ្ញុំជឿជាក់លើសមត្ថភាពរួមរបស់យើង ក្នុងការធ្វើឱ្យជំហានសកម្មចាំបាច់ទាំងអស់ អាចជំរុញគំនិតរបស់ប្រធានាធិបតី Macron ទៅជាសកម្មភាពបាន។

សម្រាប់ពេលនេះ មេដឹកនាំលោកខាងលិចកំពុងតាមដានយ៉ាងប្រុងប្រយ័ត្នជុំវិញរបាយការណ៍វត្តមានកងទ័ពកូរ៉េខាងជើងដែលធ្វើដំណើរទៅកាន់អ៊ុយក្រែន។

ទាំងប្រមុខអង្គការណាតូ លោក Mark Rutte ទាំងរដ្ឋមន្ត្រីការពារជាតិអាមេរិក លោក Lloyd Austin ពុំបានបញ្ជាក់ពីរបាយការណ៍ដែលត្រូវបានចែករំលែកដោយមេដឹកនាំនៃប្រទេសកូរ៉េខាងត្បូង និងអ៊ុយក្រែននោះទេ ទោះបីជាលោក Austin បាននិយាយថា ការដាក់ពង្រាយបែបនេះ ប្រសិនបើមានការបញ្ជាក់ នឹងបង្កឱ្យមានការព្រួយបារម្ភនៅក្នុងសហរដ្ឋអាមេរិក យ៉ាងណាក៏ដោយ៕