​អា​ហ្វ​ហ្គា​នី​ស្ថាន៖ រដ្ឋមន្ត្រីការបរទេស​ស្ដីទី​អា​ហ្វ​ហ្គា​នី​ស្ថានលោក Amir Khan Muttaqi បាន​និយាយ​កាលពី​ថ្ងៃ​ចន្ទ​ថា រដ្ឋាភិបាល​ថ្មី​របស់​ពួក​តា​លី​បង់​នៅ​អា​ហ្វ​ហ្គា​នី​ស្ថាន​អាច​គ្រប់គ្រង​ការ​គំរាម​កំហែង​ពី​ក្រុម​សកម្ម​ប្រយុទ្ធ​រដ្ឋ​អ៊ីស្លាម ISIS ដែល​បាន​បើក​ការវាយប្រហារ​ដ៏​កក្រើក​ជា​បន្តបន្ទាប់​ក្នុង​រយៈ​ពេល​ប៉ុន្មាន​សប្ដាហ៍​ថ្មីៗ​នេះ​។

​ថ្លែង​នៅ​ក្នុង​ព្រឹត្តិការណ៍​មួយ​នៅ​ទីក្រុង​ដូ​ហាប្រទេស​កាតា លោក​បាន​និយាយ​ថា​ អស្ថិរភាព​នៅ​អា​ហ្វ​ហ្គា​នី​ស្ថាន​មិន​ស្ថិត​នៅ​ក្នុង​ផលប្រយោជន៍​របស់​នរណា​ម្នាក់​ឡើយ ហើយ​លោក​បាន​អំពាវនាវ​ឱ្យ​មាន​ការ​សហការ​ពី​សហគមន៍​អន្តរជាតិ ដោយ​និយាយ​ថា ​អា​ហ្វ​ហ្គា​នី​ស្ថាន​នឹង​មិន​មែន​ជា​មូលដ្ឋាន​សម្រាប់​ការវាយប្រហារ​ទៅលើ​ប្រទេស​ផ្សេង​ទៀត​ឡើយ​។ ​លោក Ameer Khan Muttaqi រដ្ឋមន្ត្រី​ការបរទេស​តា​លី​បង់​ដែល​ត្រូវ​បាន​តែង​តាំង​សម្រាប់​ប្រទេស​អា​ហ្វ​ហ្គា​នី​ស្ថាន​ កាលពី​ថ្ងៃ​ចន្ទ​បាន​បង្ហាញ​ខ្លួន​ជា​លើកដំបូង​នៅ​ក្រៅ​ប្រទេស​អា​ហ្វ​ហ្គា​នី​ស្ថាន ​ចាប់​តាំង​ពី​ការ​ដួល​រលំ​រដ្ឋធានី​កា​ប៊ុល​ជិត​ពីរ​ខែ​មកនេះ​។​ ពួក​តា​លី​បង់​និយាយ​ថា ខ្លួន​ចង់បាន​ទំនាក់ទំនង​ល្អ​ជាមួយ​សហគមន៍​អន្តរជាតិ ដោយ​ជំរុញ​កិច្ច​សហប្រតិបត្តិការ​របស់​ខ្លួន​ដើម្បី​ជួយ​ទប់ស្កាត់​ពី​ការ​ដួល​រលំ​សេដ្ឋកិច្ច​។​ លោ​កថា ​រដ្ឋាភិបាល​តា​លី​បង់​បាន​គ្រប់គ្រង​ក្រុម​រដ្ឋ​អ៊ីស្លាមដែល​កំពុង​មាន​សកម្ម​ភាព​កាន់​តែ​ខ្លាំង​ឡើង​។​

​ក្រុម​រដ្ឋ​អ៊ីស្លាម​បាន​ទទួល​ខុសត្រូវ​ចំពោះ​ការវាយប្រហារ​ថ្មីៗ​នេះ ​រួម​ទាំង​ការ​បំផ្ទុះ​គ្រាប់បែក​អត្តឃាត​កាលពី​ថ្ងៃ​សុក្រ​សប្ដាហ៍​មុន​ ដែល​បាន​សម្លាប់​ជនជាតិភាគតិច​អ៊ីស្លាម​និកាយ​ស៊ី​អ៊ី​ត ៤៦​នាក់ និង​រាប់​សិប​នាក់​ទៀត​រង​របួស ខណៈ​ដែល​ពួកគេ​កំពុង​ប្រារព្ធ​ពិធី​បួង​សួង​នៅ​ក្នុង​វិហារ​អ៊ីស្លាម​មួយ​នៅ​ភាគ​ខាងជើង​ទីក្រុង Kunduz ប្រទេស​អា​ហ្វ​ហ្គា​នី​ស្ថាន​។​ ​ចំណែក​ការអប់រំ​ក្មេង​ស្រី​វិញ​គឺជា​តម្រូវការ​ដ៏​សំខាន់​របស់​សហគមន៍​អន្តរជាតិ ដោយ​លោក Muttaqi បាន​គូស​បញ្ជាក់​ថា នៅ​ពេល​ដែល​ក្រុម​តា​លី​បង់​ចូល​គ្រប់គ្រង​ប្រទេស​នេះ សាលារៀន​ទាំងអស់​ត្រូវ​បាន​បិទ​ដោយសារតែ​ការ​រឹតត្បិត​វិធានការ​ទប់ស្កាត់​ការ​ចម្លង​វីរុស​កូ​រ៉ូ​ណា​៕

អត្ថបទ៖ សុខមាន